Каспий теңізіндегі қайғылы оқиға салдарынан қаза тапқан батысқазақстандық үш сарбаздың денесі туған жеріне жеткізілді. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Облыстық әкімдік таратқан ақпаратқа сәйкес, бүгін сағат 08:45-те Орал қаласының әуежайына Жеңіс Темірғалиев, Өмірбек Өмірзақ және Ақжайық Ғилаждың денесі арнайы рейспен жеткізілді.
Жерлеу рәсімдері 26 қыркүйекте өтеді
Қаза тапқан әскери қызметшілерді ақтық сапарға шығарып салу және жерлеу рәсімдері 26 қыркүйек күні өтеді.
"Мемлекет басшысының тапсырмасымен қаза тапқандардың отбасыларына жергілікті атқарушы органдар тарапынан материалдық көмек көрсетіледі. Сондай-ақ бұл іске бизнес өкілдері де атсалысады. Жерлеу рәсімдерін ұйымдастыру бойынша барлық қажетті шара қабылданып жатыр", - делінген ресми хабарламада.
Облыс әкімі бәрін тікелей өз бақылауына алды.
Оқу-жаттығу барысындағы қайғылы оқиға
Еске сала кетейік, оқу-жаттығу барысында ауа райының кенеттен күрт нашарлауы салдарынан 17 әскери қызметшіні толқын ашық теңізге алып кеткен болатын. Олардың 14-і қаза болды.
25 қыркүйек – Қазақстанда жалпыұлттық аза тұту күні.