Капшагай су қоймасында гидроцикл демалып жүрген адамдары бар үрлемелі диванға соғылды. Салдарынан 36 жастағы әйел мен 14 жастағы қыз бірнеше сынық алып, бір айдан астам уақыт өздігінен жүре алмай жүр. Бұл туралы Qazaqyia.kz порталы Kursiv Media басылымына сілтеме жасап хабарлайды.

Оқиға шілде айының соңында болған. Екі отбасы лодкаға трос арқылы бекітілген үрлемелі диванда серуендеуді ұйғарған. Зардап шеккен Назира Оспанбектің айтуынша, бір сәтте лодка судың дәл ортасында тоқтап, демалып жүргендер жүргізушіден оларды жағаға қайтаруды өтінген.

«Лодкашы лодка мен диванды тоқтатты. Біз суда тұрдық. Лодкашыға: "Бізді жағаға апар" деп айғайлай бастадық, бірақ ол бізді естімеді. Күйеуім тіпті ысқырып: "Болды, жеткілікті. Бізді жағаға апар" деді. Сол сәтте лодкашы диванды солға бұратындай траекториямен қозғала бастады. Дәл сол кезде бізге гидроцикл соғылды», — деді Назира Оспанбек.

Соқтығысу салдарынан әйел қабырғалары мен қолының бірнеше жері сынған, жамбасы шайқалған, ішкі ағзалары зақымданып, миы шайқалған. Ол үш операциядан өткен, бірақ әлі күнге дейін өздігінен жүре де, отыра да алмайды.

«Физикалық ауырсыну да қатты мазалайды, себебі сен жатып, қарапайым қажеттіліктеріңді өтей алмайсың. Бұл өте қиын. Ең ауыры — осыған қатысы барлардың ешқайсысы жауапкершілікке тартылмайды. Олар сенімен физикалық ауырсынуды бөлісе алмайды», — деп бөлісті зардап шеккен әйел.

Онымен бірге 14 жастағы Асылжан Рыскулова да ауыр жарақат алған. Қыздың аяғы мен жамбасы сынған, миы шайқалған. Оқиғадан кейін жасөспірім комаға түсіп, тек алтыншы күні есін жиған.

Асылжан операциядан өтіп, қазір де жүре де, отыра да алмайды. Тоғызыншы сынып оқушысы қашықтан оқуын жалғастыруда.

«Аяғына операция жасалды, гипс қойылды. Бір сүйек үш жерден сынған, сондықтан пластина қойдық. Үнемі ауырсынуды басатын дәрі ішеміз. Эмоционалдық жағдайымыз нашар. Мұның бәрін көру ауыр. Ана ретінде қиын», — деді қыздың анасы Жанар Рыскулова.

Зардап шеккендер полицияға жүгінген. Алматы облысы ПД мәліметінше, оқиға бойынша қылмыстық іс қозғалған.

«Теңіз немесе өзен көлігін пайдалану кезінде жол жүру қауіпсіздігі ережелерін бұзу фактісі бойынша қылмыстық іс қозғалды», — деп хабарлады Алматы облысы ПД баспасөз қызметі.

Гидроцикл жүргізушісі іс бойынша күдікті ретінде өтіп, қазір еркіндікте жүр. Зардап шеккендер сондай-ақ су көлігін жалға берген гидроцикл иесі мен лодканы басқарған ер адамды жауапкершілікке тартуды қалайды.