Израильде сот Негев шөліндегі «Кциот» түрмесін күзету үшін қолтырауындарды пайдаланудың ерекше жобасын уақытша тоқтатты. Бұл туралы Qazaqyia.kz порталы The Jerusalem Post басылымына сілтеме жасап хабарлайды.
Түрмеде терроризмге қатысты істер бойынша айыпталған немесе сотталған палестиналықтар ұсталады. Идеяны ұлттық қауіпсіздік министрі Итамар Бен-Гвир ұсынды. Оның жоспары бойынша түрменің бір бөлігінің айналасына терең орлар қазылып, оларға қолтырауындар орналастырылуы керек еді. Болжам бойынша, жыртқыштар қосымша қауіпсіздік шарасы ретінде қызмет етіп, тұтқындардың қашуына жол бермеуі тиіс еді.
Жобаға Let The Animals Live жануарларды қорғау ұйымы қарсы шықты. Оның өкілдері қолтырауындарды мұндай мақсатта пайдалану заңсыз және жануарларға да, қоршаған ортаға да зиян келтіруі мүмкін екенін мәлімдеді.
Иерусалим округтік соты жануарларды қорғаушылардың талабын қолдап, жобаның іске асырылуын уақытша тоқтатты. Сот билікке үкімет өз ұстанымын білдіргенге дейін кез келген әрекет жасауға тыйым салды. Бұл тамыз айының ортасына қарай болады деп күтілуде.
Израиль БАҚ-тың мәліметінше, жобаны іске қосуға дайындық қазірдің өзінде басталған. Түрме айналасында траншеялар қазыла бастады, ал пилоттық жобаға шамамен 21 миллион шекель (шамамен 3,25 миллиард теңге) бөлінді.
Бен-Гвирдің өзі сот шешімін қатты сынға алды. Оның айтуынша, сот жүйесі «террористер жағында» және елдің қауіпсіздігін қамтамасыз ету шараларына кедергі келтіреді.
Бұған дейін «Курсив» Ақтөбе тұрғынының Қазақстан Сыртқы істер министрлігіне 24 жастағы ұлына көмек сұрап жүгінгенін жазған болатын. Ол екі жылға жуық уақыттан бері Грекия түрмесінде отыр. Әйелдің айтуынша, Рашид Кадиров мигранттарды заңсыз тасымалдағаны үшін 125 жылға бас бостандығынан айыруға сотталған.