Индонезияда күшті жер сілкінісі болып, билік цунами қаупі туралы ескерту жариялады. Бұл туралы Qazaqyia.kz порталы AP агенттігіне сілтеме жасап хабарлайды.
Индонезияның метеорология, климатология және геофизика агенттігінің (BMKG) мәліметінше, жер сілкінісінің магнитудасы 7,7 болды. Эпицентр Шығыс Нуса-Тенгара провинциясындағы Мбай қаласынан солтүстік-шығысқа қарай шамамен 30 шақырым жерде, теңізде орналасқан. Ошақ шамамен 15 шақырым тереңдікте жатқан.
Жер асты дүмпулерінен кейін BMKG Индонезияның бірнеше аймағына цунами қаупі туралы ескерту жасады. Жоғары қауіп аймағына Шығыс Нуса-Тенгара және Оңтүстік Сулавеси провинцияларының аумақтары кірді. Атап айтқанда, Манггарайдың солтүстік аудандары, Нгада, Батыс Манггарай, Энде және Сикка, сондай-ақ Селаяр аралы және басқа да бірқатар аумақтар үшін ескерту жұмыс істейді.
Кейбір аудандар үшін теңіз деңгейінің айтарлықтай көтерілу қаупін қарастыратын SIAGA деңгейі жарияланды. Басқа аумақтар үшін цунами толқындарының ықтималдығы туралы ескертетін WASPADA деңгейі қолданылады.
Жер сілкінісі 15 тамызда Батыс Индонезия уақытымен 04:58-де болды. Бастапқыда BMKG оның магнитудасын 7,0 деп бағалаған, алайда кейін көрсеткіш 7,7-ге дейін қайта қаралды.
Негізгі дүмпуден кейін аймақта жаңа жер сілкіністері тіркелді. Атап айтқанда, BMKG Лабуан-Баджодан солтүстік-шығысқа қарай шамамен 46 шақырым жерде магнитудасы 6,2 болатын дүмпу туралы хабарлады. Ведомство тұрғындарды қайталанатын жер сілкіністерінің ықтималдығы туралы ескертті.
Қазіргі уақытта қаза тапқандар мен қирағандар туралы ақпарат жоқ. Жағалау аймақтарының тұрғындарына BMKG-нің ресми хабарламаларын қадағалап, жергілікті биліктің нұсқауларын орындау ұсынылады.