Күннің суытуына және автокөлік шиналарын ауыстыру науқанының басталуына байланысты Ішкі істер министрлігі интернет арқылы қысқы дөңгелектерді сату кезінде жасалатын алаяқтық туралы ескертті. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Алаяқтық схемасы қалай жұмыс істейді
Алаяқтар интернет-платформаларда, әлеуметтік желілерде және мессенджерлерде қысқы шиналарды қолжетімді бағамен сату туралы хабарландырулар жариялайды. Өздерін сатушы ретінде таныстырып, тауарды брондау үшін алдын ала төлем жасауды немесе ақшасын толық аударуды ұсынады. Бұл ретте сұраныстың жоғары екенін және шиналардың саны шектеулі екенін алға тартады.
Ақшаны алғаннан кейін алаяқтар байланысқа шықпай, сатып алушыларды бұғаттап, хабарландыруларын өшіріп тастайды. Соның салдарынан азаматтар тауарсыз қалып, ақшасынан айырылады, дейді министрлікте.
Сарапшылардың ұсыныстары
Осындай жағдайлардың алдын алу мақсатында мынадай сақтық шараларын ұстану ұсынылады:
- 01тауарды қолыңызға алмай тұрып, бейтаныс сатушыларға алдын ала төлем немесе толық сомасын аудармаңыз;
- 02бағасы тым төмен ұсыныстарға сенбеңіз;
- 03мүмкіндігінше шиналарды ресми дүкендерден және сенімді сауда орындарынан сатып алыңыз;
- 04төлем жасамас бұрын тауардың бар-жоғын және жай-күйін жеке тексеріңіз;
- 05күмәнді сілтемелерге өтпеңіз, банк деректері мен SMS-кодтарды бөгде адамдарға бермеңіз.
Тәртіп сақшылары төмен баға мен тез алдын ала төлем жасауды талап ету интернет-алаяқтықтың белгілері болуы мүмкін екенін де ескертті.