Hyundai 94,6 мың Genesis автомобилін орындықтарды реттеу электрқозғалтқыштарының өртену қаупіне байланысты отзывқа қайтарады. Ақау қозғалтқыш өшіп тұрса да қызып кетуге және өртке әкелуі мүмкін. Бұл туралы Qazaqyia.kz порталы Kursiv Media басылымына сілтеме жасап хабарлайды.
Мәселе 2015–2017 жылдары шығарылған Genesis және орындық жады функциясы жоқ 2017–2020 жылдардағы G80 седандарына қатысты. Hyundai деректері бойынша, реттеу қосқыштарының блогына күшті сыртқы соққы ішкі элементтерді жылжытып, қосқышты тұрып қалуы мүмкін. Нәтижесінде электрқозғалтқыш автомобиль өшірілгеннен кейін де жұмысын жалғастырып, өрт тудыруы ықтимал.
Отзывқа 51,6 мың Genesis және 39,9 мың G80 кірді. Компанияның бағалауы бойынша, ақау шамамен 1% машинада болуы мүмкін.
АҚШ-тың Ұлттық тас жолдардағы қауіпсіздік басқармасының (NHTSA) деректері бойынша, АҚШ-та орындықтарды реттеу механизміне байланысты екі өрт оқиғасы тіркелген. Біріншісі 2021 жылы 2018 жылғы Genesis G80-мен болса, екінші ықтимал оқиға 2022 жылдың тамызында анықталған.
Hyundai Оңтүстік Кореяда да осындай оқиғалар туралы хабарламалар алған, бірақ олардың нақты саны ашылмайды.
Өндіруші иелеріне ашық ауада тұрақтауды және күйік иісін немесе қосқыштардың ақаулығын бақылауды ұсынады. Ақауды жою әдісі әзірленуде. АҚШ-та иелер мен дилерлерге хабарламалар 6 желтоқсанда жіберіле бастайды, бірақ өз автомобилін VIN бойынша NHTSA сайтында тексеруге болады.
Оңтүстік корей брендінің премиум седаны Қазақстанда ресми түрде 28,7 млн теңгеден бастап сатылады. Алайда ағымдағы отзыв американдық нарыққа арналған белгілі бір жылдардағы және жиынтықтағы машиналарға қатысты.
Бұған дейін Kursiv Auto қауіпті орындықтарға байланысты шамамен 5,4 мың Hyundai кроссоверінің отзывы туралы жазған болатын.