Йемендік «Ансар Аллах» (хуситтер) қозғалысы Сауд Арабиясына қарсы теңіз блокадасын енгізгенін жариялады. Бұл туралы қозғалыстың әскери өкілі Яхья Сариа мәлімдеді, деп хабарлайды «Әл-Масира» телеарнасы. Бұл туралы Qazaqyia.kz порталы Kursiv Media басылымына сілтеме жасап хабарлайды.
Сарианың айтуынша, Йеменнің қарулы күштері Сауд Арабиясына қатысты теңіз кеме жүрісіне тыйым салуды «блокадаға блокадамен жауап» қағидаты бойынша енгізеді. Шешім мәлімдеме жарияланған сәттен бастап күшіне енді.
Хуситтер бұл әрекеттерін Йеменге қарсы көп жылдық блокадаға жауап деп санайды. Олардың айтуынша, блокада 12 жылға жуық уақытқа созылып келеді. Олар Сауд Арабиясын порттар мен әуежайларды бұғаттады, сондай-ақ ел аумағына соққылар жасады деп айыптайды.
Мәлімдемеде сондай-ақ қозғалыс «оқиғалардың кез келген даму нұсқасына» дайын екендігі және Эр-Рияд тарапынан одан әрі шиеленісу жағдайында қатаң жауап қайтаратыны айтылған. Сонымен қатар, хуситтер Йемен тұрғындарын жалпы жұмылдыруға және қарулы құрамаларды қолдауға дайын болуға шақырды.
Reuters агенттігінің хабарлауынша, бұл қадам АҚШ пен Иран арасындағы қақтығыс аясында қарама-қайшылықтың жаңа майданын ашады және әлемдік мұнай жеткізілімі мен халықаралық саудаға қауіп төндіреді.
Эр-Рияд әзірге мәлімдемеге ресми түрде түсініктеме берген жоқ.
Reuters бағалауы бойынша, әлемдегі ең маңызды теңіз жолдарының бірі – Баб-әл-Мандеб бұғазының толық жабылуы әлемдік мұнай жеткізілімін шамамен 7%-ға қысқартуы мүмкін, өйткені сауд экспортының едәуір бөлігі осы бағыттан өтеді. Бұл Парсы шығанағындағы қақтығыстың салдарын күшейтуі мүмкін, ол қазірдің өзінде әлемдік мұнай жеткізілімінің шамамен 10%-ға қысқаруына әкелді.
Хуситтердің мәлімдемесі Иран мен АҚШ арасындағы шиеленісті төмендетуге бағытталған жаңа дипломатиялық әрекеттер туралы хабарлар аясында жасалды. Reuters деректері бойынша, Тегеран делдалдар арқылы 10 күндік атысты тоқтату туралы ұсыныс алды, бұл өткен айда жасалған уақытша келісімді сақтауға және одан әрі келіссөздер үшін жағдай жасауға көмектесуі керек.
Дүйсенбі күні таңертең мұнай бағасы Ормуз бұғазы арқылы кеме жүрісіндегі жаңа үзілістерден кейін қысқа уақыт ішінде барреліне 90 доллардан асты. Кейін Иран Сыртқы істер министрлігінің делдалдық байланыстар туралы мәлімдемелерінен кейін баға ішінара төмендеді.
Осы аяда Ислам революциясы сақшыларының корпусы аймақтағы американдық әскери нысандарға соққылар жасалғанын хабарлады, бұл ирандық қалаларға жасалған американдық шабуылдардың кезекті сериясына жауап болды. Сонымен бірге, Иран билігі дипломатиялық байланыстарды жалғастырып, қақтығыстың шиеленісуін төмендетуге қол жеткізуге үміттенеді.