«Хоргос» халықаралық шекара маңы ынтымақтастық орталығында QGate электрондық тексеру жүйесі енгізілуде. Мамандардың айтуынша, бұл жүйе шекарадан өту уақытын 10 секундқа дейін қысқартып, кезектерді азайтады. Қазіргі уақытта бұл жерде шекараны күн сайын шамамен 5 мың адам кесіп өтеді, деп хабарлайды «Жетінші арна». Бұл туралы Qazaqyia.kz порталы Kursiv Media басылымына сілтеме жасап хабарлайды.
«Хоргос» Жетісу облысының танымал туристік бағыттарының бірі болып қала береді. Биыл өңірге 2 миллионнан астам турист келді. Олардың көпшілігі Алакөл және Балқаш көлдерінде, «Алтын-Емел» ұлттық паркінде және шекара маңы орталығында болды.
Облыстық туризм басқармасының бас маманы Мұрат Мәдиевтің айтуынша, былтыр «Хоргос» шамамен 2 миллион қонақ қабылдаған.
«Былтыр шекара маңы ынтымақтастық орталығына шамамен 2 миллион адам келді, ал билеттерді сатудан түскен табыс көлемі үш миллиард теңгеден асты», — деді Мәдиев.
Орталық аумағында 50-ге жуық жаңа туристік жоба іске қосылды. Сауда жасаудан бөлек, келушілерге Қытай мәдени орталығының мұражайына, 9D-кинотеатрға және саябаққа бару ұсынылады.
Сондай-ақ «Хоргоста» шығыс медицинасы қызметтері көрсетіледі. Оларды күн сайын 100-ден астам адам алады.