Алматы соты Orda.kz сайтының бұрынғы бас редакторы Гүлнәр Бажкенованы 8 жылға бас бостандығынан айыру туралы үкім шығарды. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Сот үкіміне сәйкес, оған қосымша 5 жыл мерзімге бұқаралық ақпарат құралдары, журналистика, блог жүргізу, жария іс-шаралар және өзге де қоғамдық қызмет салаларында қызметпен айналысуға, сондай-ақ БАҚ-қа байланысты ұйымдарда басшылық және материалдық жауапты лауазымдарды атқаруға тыйым салынды.
Бажкенова Қазақстан Қылмыстық кодексінің 189-бабы 4-бөлігінің 2-тармағында (сеніп тапсырылған бөтен мүлікті иемдену немесе ысырап ету), 214-бабы 2-бөлігінің 2-тармағында (заңсыз кәсіпкерлік), 274-бабы 2-бөлігінің 1, 3-тармақтарында (көрінеу жалған ақпарат тарату және ұрлау) көзделген қылмыстарды жасағаны үшін айыпталған.
Сот мәліметінше, 2024 жылғы қараша мен 2025 жылғы желтоқсан аралығында "О" ЖШС-нің басшысы болған Бажкенова қызметтік жағдайын пайдаланып, компанияның есепшоттарынан 88 144 127 теңгені жымқырған. Ол бұл қаражатты жалған жарнамалық, кәсіби және ғылыми қызметтер үшін ақы төлеу деген сылтаумен өз бақылауындағы жеке кәсіпкердің есепшотына аударған. Сондай-ақ ұлының жекеменшік халықаралық мектепте оқу ақысын төлеген.
Сонымен қатар, кәсіпкер ретінде тіркелмей, Алматы қаласында пәтерлерді сатып алу және сату арқылы 121,2 млн теңге табыс тапқан, алайда одан салық төлемеген.
Соттың мәліметінше, Бажкенова 2024-2025 жылдары ақпараттық-талдамалық порталдың бас редакторы қызметін атқара отырып, адамдар тобымен алдын ала сөз байласқан. Олар интернет-ресурстар мен әлеуметтік желілер арқылы 8 эпизод бойынша көрінеу жалған ақпаратты бірнеше рет таратқан. Соның салдарынан азаматтардың, ұйымдар мен мемлекеттің құқықтары мен заңды мүдделеріне елеулі зиян келтірілген.
Қазақстан Қылмыстық кодексінің 74-бабының 1-бөлігі негізінде 14 жасқа толмаған баласының болуына байланысты жазаны өтеу 2 жылға кейінге қалдырылды. Сондай-ақ, материалдық залалды өтеу есебіне 95 992 350 теңге, 2 879 770 теңге мөлшерінде мемлекеттік баж, сондай-ақ жәбірленуші тараптың заң көмегіне ақы төлеу және процестік шығындары ретінде 6 800 000 теңге өндірілді.