Грек компаниялары Қазақстанда лифт жабдығы мен сүт өнімдерін шығаруды жоспарлап отыр. Doppler компаниясы Астанада лифт жабдығын өндіруді бастауды пысықтап жатыр, ал Desserta Hellas Ақмола облысында сүт өнімдері зауытын салуды қарастыруда. Бұл бастамалар Қазақстанда дайындалып жатқан жалпы құны $122 млн болатын бес грек инвестжобасының қатарына кіреді. Бұл туралы Qazaqyia.kz порталы Kursiv Media басылымына сілтеме жасап хабарлайды.
Келіссөздер мен мәлімдеме
Бірлескен жобаларды Қазақстан Сыртқы істер министрінің орынбасары Ардақ Зебешев пен Греция елшісі Антониа Кацуру талқылады. Лифт пен сүт өнімдерін өндіруден бөлек, компаниялар өнеркәсіптік және тұрмыстық қалдықтарды қайта өңдеу мен күн энергетикасы жобаларын да қарастырып отыр.
«Грек бизнесінің Қазақстанға қызығушылығы барған сайын практикалық сипат алып келеді, қазір жалпы уағдаластықтардан нақты экономикалық нәтижелерге көшетін уақыт. Біз әр инвесторды – алғашқы келіссөздерден кәсіпорынды іске қосуға дейін сүйемелдеуге дайынбыз», – деді Зебешев.
Doppler туралы
Doppler — 2000 жылы құрылған грек лифт өндірушісі. Оның бас кеңсесі мен зауыты Поликастро қаласында орналасқан. Компания жолаушылар мен жүк лифттерін, автомобиль көтергіштерін және қосалқы бөлшектерін шығарады, делінген оның ресми сайтында. Астанада нақты қандай өнім шығарылатыны, жобаға қанша қаражат салынатыны және кәсіпорын қашан іске қосылатыны ведомство тарапынан әзірге нақтыланған жоқ.
Desserta Hellas туралы
Desserta Hellas Грецияда 1996 жылы құрылған. Ол австриялық Berglandmilch сүт кооперативінің өнімдерін Грецияда, Кипрде және Балқанда ұсынады. Ассортиментіне сүт, қышқыл сүт өнімдері, сары май және ірімшіктер кіреді. 2024 жылы компания Doriki ірімшік кәсіпорнын сатып алып, өз өндірісін дамыта бастады.
Грекияның Kathimerini газеті Desserta Hellas-ты Berglandmilch-тің еншілес компаниясы деп атайды. Doriki-ді сатып алғаннан кейін ол Янина маңындағы Эпископикода фета шығаратын зауыт пен Андравида ауданында сүт жинау пунктін алды.
2026 жылдың шілдесінде Desserta Hellas пен Berglandmilch қазақстандық тараппен сүтті қайта өңдеу, ірімшік және йогурт өндіруді талқылаған болатын. Kazakh Invest деректері бойынша бірнеше нұсқа қарастырылды: жеке өндіріс, жергілікті серіктестермен бірлескен кәсіпорын немесе жеткізуден Қазақстанда өнім шығаруға біртіндеп көшу. Делегация сондай-ақ Ақмола облысындағы «Астана Өнім» шаруашылығына барды.
Инвестициялық ынтымақтастық
Қазақстанда грек капиталы қатысқан 50-ге жуық кәсіпорын жұмыс істейді. Жалпы екі ел ынтымақтастығының портфелінде $133,5 млн болатын сегіз инвестициялық жоба бар.
Олардың біреуі қазірдің өзінде жүзеге асырылып жатыр: SABO компаниясы Өскемен, Семей және Ақтөбеде қатты тұрмыстық қалдықтарды қайта өңдейтін үш зауыт салып жатыр.
METLEN Energy & Metals компаниясы металлургиялық қалдықтарды қайта өңдеп, олардан мыс, мырыш, никель, кобальт және басқа да маңызды металдарды алу мүмкіндігін зерттеп жатыр.
Сауда байланысы
Елдер арасындағы сауданың негізі әзірге мұнай болып қала береді. Қазақстан — Грецияға шикі мұнай жеткізетін екінші ірі жеткізуші: оның үлесіне грек мұнай импортының шамамен 24%-ы тиесілі.
2025 жылы елдер арасындағы тауар айналымы $2,4 млрд болды. 2026 жылдың қаңтар–шілдесінде ол $1,5 млрд-қа жетті — өткен жылдың сәйкес кезеңімен салыстырғанда 7%-ға артық.