Қазақстанның Ұлттық олимпиада комитетінің төрағасы әрі халықаралық World Boxing федерациясының президенті Геннадий Головкин украиндық «Миротворец» сайтының дерекқорына енгізілді. Атақты қазақстандық боксшының профилі ресурста 15 тамызда пайда болды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Сайт ұйымдастырушылары World Boxing басшысын «ресейлік агрессияны ашық қолдады» деп айыптайды. Оған себеп — федерацияның басқару органының ресейлік және беларусь спортшыларына қойылған шектеулерді толық алып тастау туралы шешімі.
Осы жылдың шілдесінде World Boxing ұйымы Ресей мен Беларусь боксшыларына өз елдерінің рәміздерімен барлық жастағы халықаралық турнирлерге қатысуға рұқсат берді. Еске салайық, дәл осы халықаралық құрылым олимпиадалық боксты басқарады және 2028 жылғы Олимпиада ойындарына іріктеу жарыстарын өткізеді.
World Boxing атқару комитетінің ресми мәлімдемесінде ресейлік спортшылар басқа елдердің боксшыларымен тең дәрежеде жарыстарға қатысатыны, алайда ұйым олардың мінез-құлқы мен антидопингтік хаттамалардың сақталуын қатаң бақылауды жалғастыратыны атап өтілді.
««Миротворец» орталығы құқық қорғау органдарынан сайттағы бұл жарияланымды азаматтың Украинаның ұлттық қауіпсіздігіне, бейбітшілікке, адамзат қауіпсіздігіне және халықаралық құқықтық тәртіпке қарсы саналы әрекеттер жасағаны туралы мәлімдеме ретінде қарастыруды сұрайды», — делінген Головкиннің украиндық ресурстағы карточкасында.
Спортшыларды қайтару процесі көктемде басталған болатын. Наурызда World Boxing атқару кеңесі Ресей мен Беларусь бокс федерацияларының ұйымға кіру туралы өтінімдерін мақұлдап, содан кейін спортшыларды қабылдау шарттары бойынша түсініктеме алу үшін Халықаралық олимпиада комитетіне (ХОК) сұрау жіберді.
Геннадий Головкин World Boxing-ті 2025 жылдың 23 қарашасынан бастап басқарады. Жарияланым кезінде боксшының өзінен, Қазақстан ҰОК-нен немесе World Boxing өкілдігінен «Миротворец» базасына енгізу туралы ресми түсініктемелер түскен жоқ.
«Миротворец» сайты дегеніміз не
«Миротворец» — 2014 жылы құрылған украиндық интернет-ресурс. Бұл бейресми қоғамдық дерекқор, оған белсенділер өздерінің пікірінше Украинаның ұлттық қауіпсіздігіне қауіп төндіретін адамдар туралы мәліметтерді енгізеді. Порталда бүкіл әлемнен жоба авторларының наразылығын тудырған қоғам қайраткерлерінің, саясаткерлердің, журналистердің және спортшылардың жеке деректері жарияланады. Бірқатар елдердің билігі мен халықаралық құқық қорғау ұйымдары сайтты жеке деректерді жариялағаны және құқықтық ашықтықтың жоқтығы үшін бірнеше рет сынға алды.