Газа секторының Дейр әл-Балах қаласындағы аурухана қызметкерлерінің мәліметінше, дүйсенбі күні израильдік соққылар мен танк оғынан кемінде 4 адам, оның ішінде екі бала қаза тапты. Бұл АҚШ делегациясы Израильді шабуылдарды азайтуға шақырғаннан бір апта өткен соң болды. Бұл туралы Qazaqyia.kz порталы Associated Press басылымына сілтеме жасап хабарлайды.
Израиль әскерінің эвакуация туралы ескертуінен кейін орталық Газадағы Бурейдж босқындар лагеріндегі ғимаратқа соққы жасалды. Бір отбасы қашып үлгермеді, нәтижесінде 4 жасар бала қаза тапты. Оны Awda ауруханасына жеткізген, анасы мен әпкесі жараланған. Израиль әскерилері бұл оқиғаға түсініктеме бермеді.
Тұрғындардың айтуынша, эвакуация туралы ескертулерден кейін израильдік соққылар аумақтағы тағы үш ғимаратқа тиді. Кейбір адамдар балаларын көтеріп жүгірсе, басқалары қираған үйінділер арасында арбамен немесе таяқпен жүрді. Қираған аймақтың үстінен түтін көтерілді.
Израиль әскері бұл операцияларды ХАМАС пен басқа да топтардың қалдықтарын жою үшін жүргізіп жатқанын мәлімдеді. Алайда, АҚШ делегациясының соңғы сапары Израильдің әскери қимылдарын қысқартуды талап еткен болатын. Бұл жағдай халықаралық қауымдастықтың алаңдаушылығын тудырып отыр.