Гана парламенті мамыр айында қабылдаған жаңа заң қозғалыстағы қоғамдық көліктерде уағыз айтуға және сауда жасауға тыйым салады. Бұл туралы Qazaqyia.kz порталы BBC News басылымына сілтеме жасап хабарлайды.
Заң бойынша, қоғамдық көліктерде уағыз айтқан адамдар сегіз айға дейін бас бостандығынан айырылуы, 52 долларға дейін айыппұл төлеуі немесе екі жазаны да қатар алуы мүмкін. Жаңа ереже жолаушылардың қауіпсіздігі мен жайлылығын қамтамасыз етуді мақсат етеді.
Гана — халқының басым бөлігі христиан дінін ұстанатын ел. Мұнда қоғамдық көліктерде уағыз айту кең таралған. Ұзақ қашықтыққа қатынайтын автобустарда пасторлар Інжіл оқып, күнәһарларды тәубеге шақырады. Кейде жолаушылар оларға ақшалай көмек те береді.
61 жастағы Gospel Light шіркеуінің пасторы Боатенг Бисмарк Джеймс 2023 жылдан бері Neoplan станциясынан шығатын коммерциялық көліктерде уағыз айтып келеді. Ол BBC-ге жергілікті тви тілінде сөйлеген сұхбатында: "Мен коммерциялық көліктерде уағыз айтамын, өйткені барлығы жексенбіде шіркеуге бара алмайды. Көптеген жолаушыларға күнәларынан тәубе ету үшін біздің құтқарылу хабарымыз қажет. Кейбір автобустарда тіпті науқастарды емдейміз", — деді.
Пастор Кумаси қаласына баратын автобусқа мінер алдында жолаушылармен әңгімелеседі. Кейбір жолаушылар оны мұқият тыңдаса, енді біреулері назар аудармауға тырысады.
Сыншылардың айтуынша, қозғалыстағы көлікте уағыз айту жүргізушіні алаңдатып, қауіпсіздікке қатер төндіреді. Ал қолдаушылар уағыз айту — христиандық парыз және діни сенім бостандығы аясында қорғалуы тиіс деп санайды.
30-дан астам жастағы, өзін Черри Локко деп таныстырған әйел қоғамдық көлікте тыныштықты ұнататынын айтады: "Маған бұл ұнамайды, өйткені олар мазалайды. Кейбіреулері, әсіресе жаныңда отырсаң, байқаусызда сілекейін шашады. Шу мен сілекей тұрғысынан да мазалайды. Қоғамдық көлікте болғанда тыныштықты қалаймын".
Әлеуметтік желілерде тараған бейнежазбада шағын автобусқа мінуге әрекеттенген пасторға жолаушының ашуланып қарсылық білдіргені көрінеді.
Кумасиге бара жатқан жолаушы Бернис Нартей пасторларға уағыз айтуға рұқсат берілуі керек, бірақ тек жолаушылардың келісімімен деп есептейді: "Уағыз кейде адамдарға тәубе етуге көмектеседі. Мысалы, біреу қиын жағдайға тап болса, пастордың хабары оған жаңа үміт сыйлай алады".
Боатенг жаңа заңнан кейін алаңдаушылық білдіріп, діни уағызшыларға ерекшелік берілуін сұрайды: "Біз қатты алаңдаймыз, өйткені мұндағы пасторлардың көбісі жолаушылар беретін ақшалай сыйлықтар арқылы отбасын асырайды. Үкімет бізге автобустарда уағыз айтуға және Аккрадан шыққанда түсуге рұқсат беруі керек".
Ол үшін уағыз айту — тек діни шақыру ғана емес, сонымен қатар маңызды табыс көзі. "Мен балаларымның білім алуына жағдай жасай алдым. Кенжем университетті жаңа бітірді, оқу ақысының жартысы уағыздан түскен ақшадан төленді", — дейді ол.