Гаагада сенбі күні тәртіпсіздік басталған соң, жергілікті билік иммиграция мен баспана саясатына қарсы жоспарланған шеруге тыйым салып, Нидерланд полициясы бірнеше жүз экстремистік шерушіні таратты. Бұл туралы Qazaqyia.kz порталы The Guardian басылымына сілтеме жасап хабарлайды.
Нидерландтың қоғамдық NOS телерадиокомпаниясының хабарлауынша, кейбір шерушілер полицияға отшашу мен басқа да заттарды лақтырғаннан кейін 24 адам ұсталды.
Әділет министрі Дэвид ван Веел өзінің X әлеуметтік желісіндегі жазбасында шерудегі «жиіркенішті көріністерге» «аса қатаң» жауап беруге шақырды. Шеруді экстремистік «We Are the People» ұйымы ұйымдастырған.
Ол наразылық білдірушілер нацистік сәлем беріп, антисемиттік ұрандар айтқанын, полицияға шабуыл жасап, отшашу лақтырғанын айтты.
«Демократиялық құқықтық тәртібімізді тағы да қорғап тұрған барлық полицейлерге рахмет», — деп жазды ол.
Шеру Нидерландтағы иммиграция мен баспана саясатына наразылық ретінде ұйымдастырылған болатын. Гаага муниципалитеті қала орталығындағы Маlieveld саябағында жиналған шерушілер арасында тәртіпсіздік басталған соң шеруге тыйым салып, кейіннен тобырды таратуға бұйрық берді.
Ұсталғандар түрлі құқықбұзушылықтар үшін, соның ішінде бұйрықты орындамағаны және заңсыз қару ұстағаны үшін қамауға алынды.
Ақпаратқа сәйкес, полиция тәртіпсіздікке қатысушыларға бұрыштық газ бен су атқыш қолданған.
Сенбідегі тәртіпсіздік Гаагада оңшылдардың демонстрациясы кезінде тәртіпсіздік басталғаннан кейін бір жыл өткен соң болды.
Қара киімді шерушілер мен полиция арасындағы қақтығыс кезінде полиция көлігі өртелген болатын. Орталықшыл D66 партиясының штаб-пәтеріне де шабуыл жасалды. Партия жетекшісі Роб Йеттен қазір премьер-министр.
Йеттен X әлеуметтік желісіндегі жазбасында наразылық білдірушілер полициямен әдейі қақтығыс іздегенін және «жиіркенішті» экстремистік және антисемиттік ұрандар айтқанын мәлімдеді.