Францияда Еуропаны жайлаған аномальды ыстық кезінде мыңға жуық өлім тіркелді. Бұл туралы Qazaqyia.kz порталы Kursiv Media басылымына сілтеме жасап хабарлайды.
Француз қоғамдық денсаулық сақтау агенттігінің алдын ала мәліметтері бойынша, қаза тапқандардың көпшілігі 65 жастан асқан адамдар. Олардың көбі жалғызбасты болған және үйлерінде қайтыс болған. Мамандардың ескертуінше, құрбандардың нақты саны айтарлықтай жоғары болуы мүмкін, өйткені қарттар үйі мен күтім мекемелеріндегі өлімдер туралы ақпарат әлі де түсіп жатыр.
Еуропадағы рекордтық ыстық
Экстремалды ыстық толқыны Еуропаны 20 маусымнан бастап жауып алды. Ғалымдар оны континенттегі бақылау тарихындағы ең күшті деп атады. Жоғары температура әртүрлі елдерде ондаған адамның өліміне, энергетикалық инфрақұрылымның бұзылуына, көлік және коммуналдық шаруашылық объектілерінің зақымдалуына әкелді.
Ыстықтың басылуы
Синоптиктердің мәліметінше, Франциядағы ыстықтың шыңы біртіндеп басылып, Еуропаның шығысына қарай жылжуда. Алайда елдің кейбір солтүстік-шығыс аймақтарында қауіпті жоғары температура туралы ескерту әлі де күшінде.
Францияның денсаулық сақтау министрі Стефани Рист экстремалды ыстықтың салдары температура төмендегеннен кейін тағы он күн бойы сезілуі мүмкін екенін айтты. «Бұл эпизод әлі аяқталған жоқ», — деді министр BFM телеарнасына берген сұхбатында.
Барлық жас топтарына әсері
Қоғамдық денсаулық сақтау агенттігі негізгі соққы қарт адамдарға келгенімен, ыстықтың теріс әсері халықтың барлық жас топтарына тигенін атап өтті. Бұған дейін екі баланың қаза тапқаны хабарланған болатын.
Ғалымдар Франция мен басқа да Еуропа елдеріндегі климаттың әлемдік орташа көрсеткіштен жылдам өзгеріп жатқанын, бұл экстремалды ауа райы құбылыстарын жиілететінін атап өтті.
Германиядағы рекордтық ыстық
Сонымен қатар, Германияда да рекордтық ыстық орнады. Bild басылымының хабарлауынша, бірқатар федералды жерлерде температура 40–41°C-қа жеткен, ал Берлинде рекорд жаңартылды — 39,9°C. Синоптиктер алдағы сағаттарда Германияда температура 42°C-қа дейін көтерілуі мүмкін екенін ескертіп, ыстықтың басылуы апта басында ғана күтілетінін айтты.