Ертіс өзеніне бірыңғай цифрлық паспорт берілуі мүмкін. Бұл бастаманы Шығыс Қазақстан облысының әкімі Нұрымбет Сақтағанов Павлодарда өткен халықаралық форумда ұсынды. Бұл туралы Qazaqyia.kz порталы Kursiv Media басылымына сілтеме жасап хабарлайды.
«Ертістің бірыңғай цифрлық паспорты» жаңартылып отыратын ақпараттық жүйеде өзеннің тереңдігі мен су сапасы, жағалау жағдайы, балық ресурстары, кеме жүзетін учаскелер және гидротехникалық құрылыстар туралы деректерді біріктіруі тиіс. Жаңа жүйенің арқасында өңірлер тасымалдауды, түбін тереңдету жұмыстарын және порт инфрақұрылымын жоспарлау кезінде нақты деректерді пайдалана алады.
Жүйені құру үшін ШҚО әкімі бірлескен жұмыс тобын құруды ұсынды. Оның құрамына Қазақстан мен Ресейдің мемлекеттік органдары, өңірлері және ғылыми ұйымдары кіруі мүмкін.
Сонымен қатар форумда Зайсан көліндегі Тұғыл ауылында жаңа порт таныстырылды. Жоба әзірге пысықтау сатысында. Жобаға негіз болатын нысандар — қолданыстағы айлақ, қоймалар және Тұғыл – Майқапшағай аралығындағы 99 шақырымдық теміржол.
Жаңа порт арқылы құм, гранит, қиыршық тас және бентонит тасымалдау жоспарланып отыр. Тасымалдау көлемі бір навигацияда үш миллион тоннадан асуы мүмкін, алайда оларды жүк жөнелтушілермен әлі келісу және бағыттардың экономикасын есептеу қажет.
Бұған дейін «Курсив» Қазақстан, Қытай және Ресейдің Ертіс өзенін бірлесіп пайдалану бойынша үшжақты консультациялар өткізуді пысықтап жатқанын жазған. Сарапшылар су және экологиялық қауіпсіздікті арттыруға, сондай-ақ энергетикалық инфрақұрылымды дамытуға көмектесетін іс-қимыл жоспарын құрып қойған.