Қазақстанда биылғы астық түсімінің сапасы жоғары. Ауа райының қолайсыздығына қарамастан диқандар мол өнім жинаумен қатар, бидайдың наубайханалық сапасын да жоғары деңгейде қамтамасыз етті, деп хабарлады Ауыл шаруашылығы министрлігі. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Элеваторлардағы бидай сапасы
Министрліктің хабарлауынша, элеваторларға қабылданған жұмсақ бидайдың 72 пайызы үшінші сұрыпқа жатады. Сондай-ақ зерттелген астық үлгілерінің 48 пайызында желімше мөлшері 28 пайыздан жоғары болған. Бұл биылғы отандық астық сапасының жоғары екендігіне дәлел.
Жекелеген өңірлерде бұл көрсеткіштер одан да жоғары. Мәселен, Ақмола облысында үшінші сұрыпты бидайдың үлесі 90 пайызға, ал Hi-Pro санатындағы бидайдың үлесі 70 пайызға жеткен.
Азық-түлік қауіпсіздігі
Бұл елдің азық-түлік қауіпсіздігін қамтамасыз етудегі өзекті факторлардың бірі. Азық-түліктік бидай қорының жеткілікті болуы ішкі нарықтың астыққа, ұнға және нан-тоқаш өнімдеріне деген қажеттілігін толық өтей отырып, қажетті қор қалыптастырады, деп хабарлады министрлік.
Сонымен қатар астықтың сапасы қазақстандық өнімнің халықаралық нарықтағы бәсекеге қабілеттілігіне тікелей ықпал етеді. Ақуыз бен желімше мөлшерінің жоғары болуы отандық бидайға ұн тарту кәсіпорындары тарапынан сұранысты арттырып, экспорттық нарықтардың аясын кеңейтеді.
Егін жинау қорытындысы
Биыл егін жинау науқанының қорытындысы бойынша елде 24,3 млн тонна астық жиналды. Әр гектардан орта есеппен 15,6 центнер өнім алынды. Бұл көпжылдық орташа көрсеткіштен жоғары.
Биыл ауыл шаруашылығы саласы үшін ауа райы қолайсыздау болды деуге негіз бар. Себебі, бірқатар өңірде ұзақ уақыт жауын-шашын болмай, құрғақшылық байқалды. Бұл егіс алқаптарының жай-күйіне кері әсер етіп, өнім көлеміне қауіп төндірді.
Соған қарамастан, агротехникалық жұмыстардың уақытылы жүргізіліп, шаруашылықтардың қажетті ресурстармен қамтамасыз етілуінің және мемлекет тарапынан көрсетілген кешенді қолдаудың арқасында саланың өндірістік әлеуеті өз деңгейінде сақталды, деп хабарлады министрлік.
Технологиялық жаңғырту
Егіншілік саласындағы технологиялық жаңғырту жұмыстары да оң нәтижесін берді. Биыл ауыл шаруашылығы тауарын өндірушілер 2,1 млн тонна минералдық тыңайтқыш енгізді. Бұл ғылыми негізделген қажеттіліктің 66 пайызына тең. Элиталық тұқымдардың үлесі 12 пайызды құрап, жоспарланған 11,6 пайыздық көрсеткіштен асты.
Ауыл шаруашылығы техникасын жаңарту жұмыстары жалғасуда. Жеңілдетілген лизинг бағдарламасының көмегімен шаруашылықтар 11 мыңнан астам ауыл шаруашылығы техникасын сатып алды. Машина-трактор паркін жаңарту деңгейі 7 пайызға жетті. Жыл соңына дейін бұл көрсеткішті 8 пайызға жеткізу көзделіп отыр, дейді министрлік.
Егін жинау науқанын уақытылы өткізу үшін өңірлерге 401,1 мың тонна дизель отыны бөлінді. Бұдан бөлек, егін жинау кезеңіндегі жауын-шашынға байланысты астық кептіруге қосымша 41,3 мың тонна отын бағытталған.