Құрылтайдың бүгінгі отырысында «Дипломмен ауылға!» бағдарламасы бойынша мерзімінен бұрын кетіп қалған жастардың саны жарияланды, деп хабарлайды Sputnik Қазақстан тілшісі. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Депутат Шахмардан Баймановтың мәліметіне сәйкес, осы уақытқа дейін бағдарламамен 55 237 маман тұрғын үй кредитін алған. Олардың 95,4 пайызы үш жылдық міндеттемесін орындап қойды. Солардың 82,3 пайызы, яғни 43 384 маман ауылда тұрақтап қалған. Бұл – оң нәтиже.
Алайда 9 321 маман міндетті мерзімнен кейін ауылдан кеткен, 2 532 маман шартты мерзімінен бұрын бұзған. «Бес жылдан кейінгі тұрақтап қалу көрсеткіші есепке алынбайды», - деді «Ауыл» партиясының өкілі.
Фракция өкілдері премьер-министрге депутаттық сауал жолдап, жас мамандарды қолдаудың ұзақ мерзімді шараларын ұсынды. Олар жұмыс берушілермен бірлесіп, алдағы үш жылға кадр қажеттілігін анықтауды; «Халықтық құрылыс» нысандарына қажетті мамандарды, бос жұмыс орындарын, инвестициялық жобалар мен кәсіпкерлік мүмкіндіктерді ескеруді; білім, жұмыс және тұрғын үй қолдауын байланыстыруды; мемлекеттік қолдаудың ұзақ мерзімді нәтижесін бағалауды ұсынды.
«Біз жаңа бағдарлама немесе қосымша қаржы сұрамаймыз. Мақсатымыз – қолданыстағы мемлекеттік қолдауды өзара байланыстырып, тиімділігін арттыру. Ең бастысы – ауыл жастарының диплом алып қана қоймай, туған жерінде тұрақты жұмыс істеп, өз болашағын құруына жағдай жасау», - деп атап көрсетті Байманов.