Денсаулық сақтау министрі Ақмарал Әлназарова Ташкентте тамақтан уланған жас футболшылар жайында айтты, деп хабарлайды Qazaqyia.kz порталы Sputnik Қазақстан басылымына сілтеме жасап.
Қазақстандықтар Өзбекстанға Dostlik Cup 2026 халықаралық футбол фестиваліне барған. 31 қазанда қонақ үйдегі таңғы астан кейін бірнеше бала өздерін жайсыз сезінген. Бір тәуліктің ішінде ауруханаға түскендердің саны 15 адамға жеткен.
«Балалардың жағдайы біздің тарапымыздан да онлайн бақылауда деп айтсақ болады. Олардың алып жатқан емі біздің хаттамамызға толығымен сәйкес келеді. Балаларды тасымалдауға немесе Қазақстанға алып келу мәселесі тұрған жоқ. Тұрған жағдайда, біз дайынбыз», — деді Әлназарова үкіметтегі брифингте.
Министрдің айтуынша, Шымкент қаласы мен Түркістан облысында қажетті төсек-орындар дайындалған болатын. Бірақ әзірше балаларды тасымалдауға қажеттілік жоқ.
«Бұл — тамақтан улану, өзбек тарапынан қосымша зерттеулер жүріп жатыр. Бізге ақпарат түскеннен кейін жариялаймыз. Бірақ балалардың өміріне ешқандай қауіп жоқ», — деді Әлназарова.