Қытайлық автогигант BYD еуропалық командасын нығайтып, Венгрияның бұрынғы сыртқы істер және сауда министрі Петер Сийяртоны басшылық қызметке тағайындады. Бұл туралы Qazaqyia.kz порталы Kursiv Media басылымына сілтеме жасап хабарлайды.
47 жастағы Сийярто 20 жылдан астам Венгрия парламентінің депутаты болды, ал 2014 жылдан 2026 жылдың мамырына дейін Сыртқы істер министрлігін басқарды. Үкіметтен кеткеннен кейін ол қытайлық автөндірушіге қосылды.
«BYD — соңғы 20 жылдағы автомобиль өнеркәсібіндегі ең табысты компаниялардың бірі. Бүгіннен бастап мен компаниялар тобының сыртқы байланыстарына және жаңа бизнес бағыттарын дамытуға жауапты боламын», — деп жазды Сийярто Facebook-тегі парақшасында.
Тағайындау Венгрия мен қытайлық автөнеркәсіп арасындағы тығыз ынтымақтастықты растады. Дәл осы ел BYD-тің басты еуропалық плацдармына айналды. Сегед қаласында компания өзінің алғашқы еуропалық автозауытын салуда, оның қуаты жылына 300 мың машинаға дейін жетеді, ал Будапеште штаб-пәтер мен зерттеу және әзірлеме орталығын орналастырады.
Венгрияға басқа да қытайлық компаниялар белсенді инвестиция салуда. Электромобильдер өндірушісі Nio батарея ауыстыру станцияларына арналған жабдықтар шығаратын еуропалық орталықты ашты, ал ірі аккумулятор өндірушілері CATL, EVE Energy және Sunwoda өз зауыттарын салуда.
Венгрия премьер-министрі Виктор Орбан қытайлық автөндірушілермен ынтымақтастықты ел экономикасын дамытудың негізгі факторларының бірі деп атады. Оның айтуынша, ҚХР-дың электромобильдер мен гибридтер саласындағы көшбасшылығы Венгрияға Еуропаның жаңа автомобиль индустриясының орталықтарының біріне айналу мүмкіндігін ашады.
Бұған дейін Курсив Авто қытайлық автобрендтердің Еуропадағы сатылымын арттырғанын жазған болатын.