Бурабай курортты аймағында квадроциклдің қатысуымен қайғылы оқиға болды. Жол-көлік оқиғасы салдарынан 22 жастағы Астана тұрғыны қаза тауып, тағы бір қыз жарақат алды. Бұл туралы Qazaqyia.kz порталы КТК басылымына сілтеме жасап хабарлайды.
Алдын ала мәліметтер бойынша, квадроцикл Зеленый Бор және Бурабай елді мекендерінің арасындағы жолмен келе жатқан. Рөлде 22 жастағы астаналық қыз болған, ол бір сәтте басқаруды жоғалтқан. Көлік құралы аударылып, жүргізуші оқиға орнында қаза тапты.
Квадроциклдің жолаушысы 19 жастағы қыз болған. Ол әртүрлі жарақаттар алып, медициналық мекемеге жеткізілді.
Оқиға бойынша полиция сотқа дейінгі тергеуді бастады. Құқық қорғау органдары апаттың барлық мән-жайын анықтауда, соның ішінде квадроциклдерді жалға беру кезінде қауіпсіздік талаптарының сақталуын тексереді.
«Осы факті бойынша қылмыстық іс қозғалды. Тергеу аясында полицейлер болған оқиғаның барлық мән-жайын анықтайды, соның ішінде квадроциклдерді жалға беру қызметін, мототехниканы жалға беру кезінде қауіпсіздік талаптарының сақталуын, сондай-ақ трагедияға әкелген басқа да ықтимал себептерді тексереді», — деп хабарлады Ақмола облысы ПД ерекше тапсырмалар жөніндегі аға инспекторы Әсем Әбдірахманова.
Бұл Бурабай курортты аймағында соңғы айлардағы квадроциклмен байланысты екінші өлім жағдайы. Осы жылдың ақпан айында квадроцикл ағашқа соғылған. Сонда 26 жастағы жолаушы ауыр жарақат алған. Дәрігерлердің күш-жігеріне қарамастан, тоғыз күннен кейін ол ауруханада қайтыс болды.