Сыбайлас жемқорлық үшін үш жылға сотталған бұрынғы мәдениет және спорт вице-министрі Ерлан Қожағапанов бостандыққа шықты. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Ішкі істер министрлігінің Қылмыстық атқару жүйесі комитетінің мәліметінше, сот шешімі негізінде бас бостандығынан айыру түріндегі жазаның өтелмеген бөлігі жазаның неғұрлым жеңіл түріне — айыппұлға ауыстырылды.
Комитет материалдарды қарау және жазаны ауыстыру, шартты түрде мерзімінен бұрын босату және үкімді орындауға байланысты басқа да мәселелер бойынша шешімдерді тек сот органдары қабылдайтынын атап өтті.
Бұрынғы мәдениет және спорт вице-министрі Ерлан Қожағапанов 2024 жылдың наурыз айында ұсталды. Ол 2018 жылы коммерциялық компанияның мүддесі үшін Петропавлда Қазақстан мен Ресейдің XV өңіраралық ынтымақтастық форумын ұйымдастыруға шарт жасасуға ықпал еткен.
Іс-шараның сметасы негізсіз екі есеге жуық ұлғайтылған, соның салдарынан мемлекетке 1 млрд теңгеден астам шығын келтірілген. 2025 жылдың мамырында сот оны кінәлі деп тауып, үш жылға бас бостандығынан айырды. Сондай-ақ оған мемлекеттік қызметте қызмет етуге өмір бойына тыйым салынды.