Бразилияның оңтүстігіндегі Парана штатында автобус пен жүк көлігінің бетпе-бет соқтығысуынан кемінде 21 адам қаза тауып, тағы төртеуі жарақат алды. Бұл туралы Qazaqyia.kz порталы BBC News басылымына сілтеме жасап хабарлайды.
Оқиға жергілікті уақыт бойынша сәрсенбі күні таңғы 04:30-да (07:30 GMT) Парана штатының оңтүстігіндегі BR-373 тас жолында болды.
Жергілікті БАҚ мәліметінше, автобус жақын маңдағы Имбитува қаласының денсаулық сақтау органдарына тиесілі болған және пациенттер мен олардың туыстарын Понта-Гросса қаласындағы емдеу мекемелеріне апарған. Бұл қала шамамен 60 шақырым (36 миль) қашықтықта орналасқан.
Билік екі көліктің соқтығысуына не себеп болғанын анықтау үшін тергеу бастады. Тас жолдың 209-шақырымындағы оқиға орнын сарапшылар мен Бразилияның федералды жол полициясы қызметкерлері тексеріп жатқандықтан, тас жол жабық.
Бразилияда жол-көлік оқиғалары сирек емес. Дүниежүзілік банк жариялаған зерттеуге сәйкес, 2023 жылы мұндай апаттардан 34 000-нан астам адам қаза тапқан, олардың көпшілігі мотоциклшілер болған.
Зерттеулер көрсеткендей, шамадан тыс жылдамдық, масаң күйдегі жүргізушілер және көлік жүргізу кезінде ұялы телефонды пайдалану жиі себеп болады.
Ақпан айында солтүстік-шығыстағы Сеара штатында фестивальге бара жатқан қажылар тиелген автобустың аударылуынан 15 адам қаза тапқан болатын.