Қазақстан мектептерінде бірінші сынып оқушыларына арналған қазақ тілінде оқытатын бейімдеу бағдарламасы енгізіледі. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Оқу-ағарту министрлігінің бұйрығында көрсетілгендей, бағдарлама қарым-қатынастың практикалық дағдыларын қалыптастыруға бағытталған. Ол нақты өмірлік коммуникативтік жағдайларды пайдалана отырып, сыныптан тыс сабақтар немесе сынып сағаттары арқылы жүзеге асырылады. Бұл дағдылар орта білім беру ұйымдарында, отбасында және қоғамдық орындарда қолданылады.
Бағдарламаны мектепте ата-аналардың өтініші бойынша немесе ата-аналардың жазбаша келісімімен мұғалімнің ұсынысы бойынша енгізуге болады. Бағдарламаны іске қосу үшін мектепте келесі шарттар орындалуы керек:
- 01бекітілген білім алушылар тізімі;
- 02бекітілген бағдарламаны іске асыру жоспары мен кестесі;
- 03білім алушылардың коммуникативтік дағдыларын дамытуға ықпал ететін қолайлы білім беру ортасы;
- 04бағдарламаның мақсаттары мен міндеттеріне сәйкес келетін оқу және әдістемелік материалдар.
Бағдарлама бойынша мұғалімдер ғана емес, ата-аналар да бірлесіп жұмыс істеуі керек. Бұл бастама оқушылардың қазақ тілінде сөйлеу дағдыларын жетілдіруге және олардың қоғамда табысты бейімделуіне көмектеседі деп күтілуде.