Берлин Сенатының әкімшілігінен ұрланған үлкен деректер архивін Rhysida хакерлік тобы даркнетте жариялады. Бұл туралы Qazaqyia.kz порталы Euronews басылымына сілтеме жасап хабарлайды.
Шамамен 1,4 млн файл, жалпы көлемі 5,8 терабайтты құрайды. Хакерлер тек қарапайым жұмыс құжаттарын ғана емес, сонымен қатар кадрлық, заңгерлік және қаржылық материалдарға қол жеткізгенін мәлімдейді. Файлдар арасында медициналық құжаттар, хат алмасулар, банк шоттарының деректері, IBAN нөмірлері және қызметкерлердің жеке деректері бар құжаттар болуы мүмкін.
Жарияланған архивте мемлекеттік қызметшілердің туу туралы куәліктері, телефон нөмірлері мен үй мекенжайлары табылды. Сондай-ақ жұмысқа шықпаған қызметкерлердің тізімдері мен әртүрлі кадрлық құжаттар бар.
Ерекше алаңдаушылық «AG CBRN-Rahmenplanung» деп аталатын қалташадан туындап отыр. CBRN аббревиатурасы химиялық, биологиялық, радиологиялық және ядролық қауіптерді білдіреді. Онда төтенше жағдайлар кезінде биліктің іс-қимыл жоспарлауына қатысты құжаттар болуы мүмкін.
Журналист-тергеуші Ларс Винкельсдорфтың айтуынша, шабуылдың ауқымы соншалық, ол мемлекетке қауіп төндіруі мүмкін. Ұрланған материалдар арасында полиция құжаттары, критикалық инфрақұрылым нысандары туралы ақпарат және төтенше жағдайлардағы биліктің іс-қимыл жоспарлары бар делінген.
Шабуыл 14 тамызда белгілі болды. Неміс БАҚ деректеріне сәйкес, хакерлер 7-12 тамыз аралығында желіге қол жеткізген. Бұзушылық анықталғаннан кейін бірнеше ведомство қалалық желіден ажыратылды. Байланысты толық қалпына келтіру тек 23 тамызда мүмкін болды.
Rhysida Берлин билігінен 30 биткоин — шамамен 2 млн еуро талап етті. Хакерлер шенеуніктерге 4 қыркүйекке дейін уақыт беріп, ұрланған деректерді жариялаймыз деп қорқытты.
Билік төлеуден бас тартты. Ультиматум мерзімі аяқталғаннан кейін топ архивті даркнетке орналастырды. Енді файлдарды желінің басқа пайдаланушылары жүктей алады.
Деректердің жариялануы Берлиндегі муниципалды сайлауға бірнеше апта қалғанда болды, ол 20 қыркүйекте өтеді. Сондықтан сарапшылар шабуылдың саяси құрамдас бөлігін де жоққа шығармайды.
Rhysida мемлекеттік және қоғамдық ұйымдарға жасалған ірі шабуылдарымен танымал. Бұған дейін топ Британдық кітапхананы бұзып, төлемнен бас тартқаннан кейін ұрланған деректерді жариялаған болатын.
Бұған дейін Kursiv LifeStyle GTA 6 материалдарының жаңа ағымы цифрлық алдын ала тапсырыстарға наразылықпен байланысты екенін жазған. «Слив» үшін жауапкершілікті өз мойнына алған Cyberleek хакерлік тобы ойын баспагерлеріне талаптар қойылған манифест жариялады.