Бельгия королі Филипп пен королева Матильда мемлекеттік сапармен Қазақстанға келді. Президент Қасым-Жомарт Тоқаев оларды Астана әуежайында жеке қарсы алды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Корольдік жұп отырған ұшақ Қазақстан шекарасын кесіп өткен сәттен бастап ел астанасының әуежайына дейін Қазақстан Әскери-әуе күштерінің истребительдерімен сүйемелденді.
Әуежайдың ұшу алаңында салтанатты қарсы алу рәсімі аясында құрметті қарауыл ротасы мен президенттік оркестр сапқа тұрғызылды.
Бұған дейін «Курсив» басылымы Король Филипп пен королева Матильданың Қазақстанға 11-14 қазан аралығында мемлекеттік сапармен келетінін жазған болатын.
Тоқаевпен кездесу барысында тараптар екі ел арасындағы ынтымақтастықты талқылайды. Сапар бағдарламасында «Қазақстан – Бельгия» іскерлік кеңесінің отырысына және екі ел университеттері ректорларының форумына қатысу көзделген. Сондай-ақ басқа да іс-шаралар жоспарланған.
Бұған дейін Филипп Қазақстанға үш рет келген, бірақ ол кезде ол әлі мұрагер ханзада мәртебесінде еді. 2002 және 2009 жылдары ол бельгиялық астронавт Франк Де Винненің ұшуына байланысты Байқоңыр ғарыш айлағын аралаған. 2010 жылы Филипп Астанаға келген бельгиялық экономикалық және сауда делегациясын басқарды.
Сапар қорытындысы бойынша бірлескен мәлімдеме қабылданып, екіжақты құжаттарға қол қойылады деп күтілуде.