Қазақстанның Оқу-ағарту министрлігінде жаңа кадрлық тағайындаулар туралы хабарланды. Юлия Овечкина Балалар құқығын қорғау комитетінің төрағасы болып тағайындалса, Фариза Дүйсенбаева Білім беру сапасын қамтамасыз ету комитеті төрағасының орынбасары қызметіне кірісті. Бұл туралы Qazaqyia.kz порталы Kursiv Media басылымына сілтеме жасап хабарлайды.
Жаңа басшыларды ұжымға оқу-ағарту министрі Жұлдыз Сүлейменова таныстырды. Тағайындауға дейін екеуі де осы ведомствода еңбек еткен.
«Бұл кадрлық шешімдер меритократия қағидатына сай келеді және ведомство қызметкерлерін олардың кәсіби тәжірибесі мен біліктілігін ескере отырып жоғарылату практикасын жалғастырады», — деп хабарлады министрлікте.
Юлия Овечкинаның еңбек жолы
Юлия Овечкина 2014 жылы Риддер қаласының білім беру жүйесінде еңбек жолын бастаған. Кейіннен Өскемен қаласы білім бөлімінің қамқоршылық және қорғаншылық органының, балалар құқығын қорғау секторының меңгерушісі болды. 2020 жылдан бастап Балалар құқығын қорғау комитеті төрағасының орынбасары қызметін атқарған. Ол сондай-ақ Президенттік жастар кадрлық резервінің құрамына кіреді.
Фариза Дүйсенбаеваның кәсіби тәжірибесі
Фариза Дүйсенбаева 2014 жылы сот жүйесінде жұмысын бастаған, кейін орталық мемлекеттік органдардың заң департаменттерінде қызметтер атқарған. 2023 жылдан бастап Оқу-ағарту министрлігінде басқарма басшысы, департамент директорының орынбасары және заң департаментінің директоры қызметтерін дәйекті түрде атқарды.
Бұған дейін «Курсив» Денсаулық сақтау министрлігіндегі кадрлық тағайындау туралы жазған болатын. Денсаулық сақтау вице-министрі болып бұрын «СК-Фармация» компаниясын басқарған Нұрлыбек Асылбеков тағайындалған еді.