Қазақстанда тағы бір BAIC (Beijing) кроссоверінің өндірісін жолға қою мүмкіндігі қарастырылуда. «Курсив Авто» көлік құралының типін бекіту тізілімінен (ОТТС) «СарыарқаАвтоПром» зауытына ресімделген BAIC X75 жаңа сертификатын анықтады. Бұл туралы Qazaqyia.kz порталы Kursiv Media басылымына сілтеме жасап хабарлайды.
ОТТС құжатына сәйкес, қытайлық паркетниктің құрастыруын Қостанайдағы кәсіпорында ұйымдастыру жоспарлануда. Құжат 2029 жылдың шілдесіне дейін жарамды және модельдің сериялық шығарылымына қолданылады. Онда бірден үш коммерциялық атау көрсетілген — X75, X7 және X7 Plus. Мұндай жағдай бір модель әртүрлі нарықтарда әртүрлі атаулармен немесе әртүрлі нұсқаларда сатылғанда кездеседі.
Қазақстанда кроссовер алдыңғы жетекпен және 177 ат күші қуаты, 300 Нм айналу моменті бар 1,5 литрлік турбокозғалтқышпен жабдықталады. Модельдің өлшемдері: ұзындығы 4745 мм, ені 1892 мм, биіктігі 1715 мм, доңғалақ базасы 2800 мм.
Опциялар мен жабдықтар
Ұсынылатын опциялар қатарына панорамалық шатыр, жүксалғыш есігінің электр жетегі, екі аймақты климат-бақылау, Apple CarPlay, сымсыз зарядтау, айналмалы шолу камералары, бейімделгіш круиз-бақылау, жолақта ұстау жүйелері, автоматты тежеу және соқыр аймақтарды бақылау кіреді.
Сондай-ақ цифрлық аспаптар панелі, 12,3 дюймдік мультимедиа экраны және сегіз динамикі бар аудиожүйе қарастырылған.
ОТТС алудың маңызы
ОТТС алудың өзі сатылымның жақын арада басталатынына кепілдік бермейді, алайда мұндай құжаттар әдетте модельдің іске қосылуына немесе жергілікті өндірістің басталуына аз уақыт қалғанда ресімделеді.
Бұған дейін «Курсив Авто» BAIC компаниясының Қазақстанда кемінде бес модель шығаруға дайындалып жатқанын хабарлаған болатын. Шілде айында BJ30, BJ40, BJ60, X35 және X55 модельдеріне ұқсас ОТТС берілген еді. Енді оларға X75 те қосылуы мүмкін.