Біріккен Араб Әмірліктерінде Умм-әл-Қайуайн эмиратының барлық жағажайлары мен жағалау аймақтары танкерден мұнай төгілуіне байланысты уақытша жабылды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Бұл туралы The National басылымы елдің Климат өзгерісі және қоршаған ортаны қорғау министрлігіне сілтеме жасап хабарлады. Көршілес Шарджа эмиратында сақтық шарасы ретінде Әл-Хамрия жағажайы да жабылды.
Ластануды ұлттық экологиялық мониторинг жүйесі анықтады. Мамандар жергілікті және федералдық қызметтермен бірлесіп, төгілуді локализациялауға, жағалауды тазартуға және экологиялық зардаптарды бағалауға кірісті. Шектеулер тексеру аяқталып, қажетті қауіпсіздік шаралары анықталғанға дейін сақталады. Балықшылар мен теңіз акваторияларын пайдаланушыларды ластанған учаскелерден аулақ болуға және биліктің нұсқауларын орындауға шақырды, деп жазады Free Press Journal.
Соңғы күндері Шарджа, Аджман және Умм-әл-Қайуайн тұрғындары әдеттен тыс иістен шағымданды. Министрлік оның халық денсаулығына қауіп төндірмейтінін мәлімдеді, деп хабарлайды Saudi Gazette.
Билік кемені және ағып кету себебін ресми түрде атаған жоқ. Orbital Risk Intelligence компаниясының жетекшісі Мартин Келли Reuters агенттігіне ластану көзі Gem No.2 танкері болғанын хабарлады. Conflict and Environment Observatory зерттеушісі Леон Морленд спутниктік суреттер бойынша дақтың ауданын шамамен 160 шаршы км деп бағалады. Windward компаниясы ағындар мұнайды Шарджа мен Аджман порттарына және тұщыландыру қондырғыларының су қабылдағыштарына апаруы мүмкін екенін ескертті. Reuters агенттігінің кеме қатынасы саласындағы дереккөздеріне сәйкес, 9 қазанда Gem No.2 кемесіне белгісіз снаряд тиіп, өрт шыққан. Бұл оқиғаның қазіргі төгілумен байланысын билік әзірге растаған жоқ.
Saudi Gazette халықаралық теңіз агенттіктеріне сілтеме жасап, 9-10 қазанда Gem No.2 кемесіне ирандық ұшқышсыз ұшу аппаратының шабуылы болды деп болжам жасайды. Басылымның деректері бойынша, сол кезде ұзындығы 330 метр кемеден 22 үнді теңізшісі құтқарылған.
Бұған дейін «Курсив» маусым айында Каспий теңізінің әзірбайжан акваториясында су асты құбыры зақымдалғаннан кейін мұнай төгілгенін жазған. SOCAR компаниясының алдын ала бағалауы бойынша, себеп кеме якорінің ілінуі болуы мүмкін; осы бағыттағы мұнай тасымалдау тоқтатылған.