Қазақстанда ауыл шаруашылығы техникасын өндіру көлемі артты. 2025 жылдың қорытындысы бойынша өндіріс көлемі 2024 жылмен салыстырғанда 22,3%-ға өсті. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Ұлттық статистика бюросының хабарламасына сәйкес, ауыл шаруашылығы және орман шаруашылығы техникасын өндірумен айналысатын кәсіпорындар мен өндірістердің саны 40 бірлікті құрады.
Өндіріс құрылымында негізгі үлес ауыл шаруашылығы машиналарына тиесілі – 72,5%.
Ресми мәліметке сәйкес, 2025 жылы елімізде 1 236 астық жинайтын комбайн өндірілді. Бұл 2024 жылмен салыстырғанда 13,7%-ға жоғары.
Комбайндар өндірісінің негізгі үлесі Ақмола облысына – 47,9%, Қостанай облысына – 32% және Солтүстік Қазақстан облысына – 18% тиесілі.
Өткен жылдың қаңтар-маусым айларында 9 астық жинайтын комбайн экспортталды. 2025 жылдың қорытындысы бойынша экспорт көлемі 16 бірлікті құрады.
Астық жинайтын комбайндардың негізгі экспорттық бағыттары Тәжікстан, Грузия және Өзбекстан болды.