Құрылтайдағы "Ауыл" фракциясы үкіметке алғашқы депутаттық сауалын жолдады. Бұл туралы Qazaqyia.kz порталы Sputnik Қазақстан басылымына сілтеме жасап хабарлайды.
Фракция депутаттары қосымша білім беру жағынан ауыл мен қала балаларының мүмкіндіктерін теңестіру мәселесін көтеріп отыр.
Оқушылар саны
Ресми мәліметке сәйкес, бүгінде республика бойынша 4,1 миллионнан астам оқушы бар.
Бірақ ауыл мен қала балаларының спорт, өнер, музыка, робототехника және IT бағыттары бойынша қосымша білім алу мүмкіндіктері бірдей емес.
"Баланың мүмкіндігі мекенжайға байланысты болмауы тиіс"
"Қалада таңдау көп болса, шағын және шалғай ауылдарда ол көбіне санаулы үйірмемен шектеледі. Баланың мүмкіндігі оның мекенжайына байланысты болмауы тиіс", — дейді депутат Шахмардан Байманов.
Оның айтуынша, "Бір ауыл – бірнеше мүмкіндік" қағидатын енгізіп, мектептерді, мәдениет үйлерін, кітапханалар мен спорт нысандарын кеңінен пайдалану қажет.
Ал шағын және шалғай ауылдарға мобильді қосымша білім беру жүйесін қарастырған жөн.
Ынталандыру тетігі мен түзету коэффициенті
"Ауылда жұмыс істейтін қосымша білім педагогтері мен мамандары үшін арнайы ынталандыру тетігін, ал ауылдық және шалғай елді мекендер үшін аумақтық түзету коэффициентін енгізуді ұсынамыз. Бұл ретте шалғайлық, бала саны, мамандарды тарту және көлік-логистикалық шығындар ескерілуі тиіс", — деп атап көрсетті Байманов.