Атбасарда кафе қызметкері ашық жертөлеге құлағаннан кейін ауруханаға жеткізілді. Nayza_kokshe паблигінің мәліметінше, әйел аспаз болып жұмыс істеген. Ақмола облысының еңбек инспекциясы не болғанын анықтап жатыр. Бұл туралы Qazaqyia.kz порталы Kursiv Media басылымына сілтеме жасап хабарлайды.
Әйел абайсызда басып кетіп, тереңдігі шамамен бес метр жертөлеге құлаған. Оқиға 24 қазанда түстің бірінші жартысында болған. Ол басынан қан кетумен ауыр жарақат және басқа да зақымдар алған. Қазір оған Атбасар аудандық ауруханасында көмек көрсетілуде.
Облыстық еңбек инспекциясы жұмыс берушінің оқиға туралы хабарламағанын мәлімдеді.
«Осы оқиға бойынша Ақмола облысы бойынша мемлекеттік еңбек инспекциясы департаментіне жұмыс берушіден жазатайым оқиға туралы хабарлама түскен жоқ. Қазіргі уақытта оқиғаның барлық мән-жайы анықталуда», — деп хабарлады ведомство.
Инспекцияда жазатайым оқиға туралы хабарламағаны үшін жұмыс берушіге әкімшілік жауапкершілік қауіп төнетінін түсіндірді. Оған сондай-ақ болған оқиға туралы хабарлама беру міндеттеледі.
Бұған дейін Павлодарда құтқарушылар қамыр илегіш машинаға қолы қысылып қалған аспазшының қолын босатқан. Жабдықты ішінара бөлшектеуге тура келген, содан кейін қызды медиктерге тапсырған.
Ал 15 қазанда Атырауда вокзалды реконструкциялау кезінде жұмысшы бес метрлік биіктіктен құлап, комаға түскен. Полиция еңбекті қорғау ережелерін бұзу туралы қылмыстық іс қозғаған.