Астанадағы Тәуелсіздік даңғылында салынып жатқан сауда-ойын-сауық орталығына қатысты жанжал күлкілі жалғасын тапты. Астаналықтар «Silk way Sity» атауындағы лингвистикалық қатені мазақ еткеннен кейін, ғимараттың қасбетіне ақыры «жөндеу жұмыстары» жүргізілді. Бұл туралы Qazaqyia.kz порталы Kursiv Media басылымына сілтеме жасап хабарлайды.
Әлеуметтік желілерде оқиға орнынан жаңа кадрлар пайда болды. Threads желісінің @fox_kzt атты қолданушысы ТРЦ-нің жаңартылған қасбетінің суретін жариялады. Суретте филологтар мен қала тұрғындарын абыржытқан «Sity» сөзіндегі «S» әрпі жай ғана қара қоқыс пакетімен жабылғаны көрінеді.
Төтенше «ребрендинг» нәтижесінде ғимараттағы жазу енді ресми түрде «SILK WAY ITY» болып оқылады.
«Біреу естіді», — деп фотоға қысқаша түсініктеме берді автор.
Еске салайық, бұрынғы хоспис орнында салынып жатқан сауда орталығына қатысты наразылық толқыны астаналықтардың орфографияға назар аударуынан кейін көтерілді. Күлкілі қатеге шағымды тіпті Астананың бірыңғай байланыс орталығы iKomek ресми тіркеп, оны осындай визуалды ақпаратты орналастырудың заңдылығын тексеру үшін уәкілетті органдарға жіберді.
Бұрын хабарланғандай, лингвистикалық қатенің артында үлкен құрылыс жанжалы тұр. БАҚ мәліметтеріне сәйкес, бастапқыда №9 және №11 учаскелерде қонақ үй кешені жоспарланған. Алайда Ханболат Назарбаев (оны Болат Назарбаевтың ұлы деп атайды) салынып бітпеген қонақ үйді өз бетінше бұзып, ТРЦ сала бастаған. Кейін нысан оның ағасы — Данияр Кесікбаев және оның «URBAN AVTO» ЖШС компаниясына қайта ресімделген.