Астанадағы «Арғымақ» ипподромында 15–16 тамызға жоспарланған BRD AUTO SHOW and FESTIVAL автофестивалі басталар алдында тоқтатылды. Бұл туралы Qazaqyia.kz порталы Kursiv Media басылымына сілтеме жасап хабарлайды.

Таңертең ұйымдастырушылар мен қонақтарды ақимат қызметкерлері мен полиция қарсы алды.

Астана Ішкі саясат басқармасының қоғамдық-саяси жұмыс және әлеуметтік жарнама бөлімінің бас маманы Ардан Аралбаев жиналғандарға іс-шара спорттық-бұқаралық және ойын-сауық іс-шараларын өткізу кезінде қауіпсіздікті қамтамасыз ету жөніндегі нұсқаулыққа сәйкес келмегендіктен тоқтатылғанын түсіндірді.

Қаржылық шығындар мен билеттерді қайтаруға кім жауап беретіні туралы сұраққа ұйымдастырушыларға қаласа, сотқа жүгіне алатынын айтты.

«Құрметті азаматтар, бейбіт жиындар мен шерулер тек Астана әкімдігімен келісілгеннен кейін өткізіледі. Бұл іс-шараны тоқтатуды сұраймын, өйткені ол келісілмеген», — деп «Нұра» ауданы әкімі аппаратының қызметкері Руслан Сабитов дауыс зорайтқыш арқылы мәлімдеді.

Астана автомотоспорт федерациясының төрағасы Анатолий Бондардың федерация қызметін аяқтағаннан кейін өтетін соңғы фестивальді өткізуге рұқсат беру туралы өтініші де нәтиже бермеді.

«Біз Қазақстанда билікпен бірге 500-ден астам іс-шара өткіздік. Мен өз кепілдігіммен бүгін соңғы іс-шараны өткізуге дайынмын. Жігіттер жай тұрады, сахна, шу мен музыка болмайды, бірақ осымен федерацияны жабамыз», — деді Бондарь.

Осыдан кейін полиция қызметкерлері жиналғандарды тарап кетуге шақырды, әйтпесе жиын заңсыз деп танылып, полиция шара қолданатынын ескертті.

Ұйымдастырушылардың бірі Дмитрий Карпинский ипподром аумағын екі күнге жалға алғанын және автошоу өткізуге барлық рұқсат құжаттары бар екенін айтты. Бірінші күнге 3 мыңнан 8 мың теңгеге дейінгі бағамен шамамен 2 мың билет сатылған.

«Полиция кеше кештен бастап көліктердің алаңға кіруін шектей бастады. Мен тиісті өтініш жаздым. Қазір адвокаттармен кеңесетін боламыз, билет ақшасын қайтарамыз. Аумақты жабу және қоршау туралы ресми құжат алған жоқпын», — деді ол.

Осыдан кейін ұйымдастырушылар, қатысушылар мен фестиваль қонақтары тарай бастады.

Бұған дейін Курсив Авто Астанадағы Automechanika 2026 көрмесінде қандай көліктер көрсетілгенін жазған болатын.