Қазақстан Премьер-лигасында 25-тур аяқталды. Соңғы ойын күні «Астана» «Елимайды» ірі есеппен ұтса, «Тобыл» «Ұлытауды» жеңді, ал «Алтай» «Қайсарды» тізе бүктіріп, төменгі аймақтан шығып кетті. Бұл туралы Qazaqyia.kz порталы Kursiv Media басылымына сілтеме жасап хабарлайды.

«Астана» – «Елимай» 4:0

Астаналық клуб «Елимайға» төрт гол соғып, есеп жібермеді. Бірінші таймның соңында Иван Башич бес минут ішінде дубль жасады, үзілістен кейін Марин Томасов гол соқты, ал Рамазан Каримов пенальтиден нүкте қойды. Голдар: Башич 40 (1:0), Башич 45 (2:0), Томасов 49 (3:0), Каримов 66 пенальти (4:0).

Бұл жеңіс «Астанаға» 45 ұпай жинап, үшінші орында бекуге мүмкіндік берді. Енді астаналық клуб «Оқжетпестен» үш ұпайға алда. Алда 55 ұпаймен «Ордабасы» және 54 ұпаймен «Қайрат» тұр. Алайда алматылықтар лидерден бір ойын аз өткізген.

Томасовтың голы оны КПЛ мергендер кестесінде көш басына шығарды. Хорватиялық ойыншының еншісінде он гол. Роман Муртазаев пен «Тобыл» шабуылшысы Урош Милованович тоғыз голдан соққан.

«Тобыл» – «Ұлытау» 3:1

Қостанайда «Тобыл» үзілістен кейін екі рет алға шығып, «Ұлытауды» 3:1 есебімен жеңді. Милованович дубль жасаса, тағы бір голды Виталий Лисакович соқты. Қонақтардың құрамында Аслан Ахмедов гол соқты. Голдар: Милованович 16 (1:0), Ахмедов 37 (1:1), Лисакович 60 (2:1), Милованович 90+2 (3:1).

Қостанайлықтар 31 ұпай жинап, қосымша көрсеткіштер бойынша «Ұлытауды» басып озып, жетінші орынға көтерілді. Жезқазғандықтар сегізінші орынға түсті.

«Алтай» – «Қайсар» 2:0

Өскеменде «Алтай» Премьер-лигада қалу үшін маңызды жеңіске жетті. Драган Стойсавлевич бесінші минутта-ақ есеп ашты, ал екінші таймда Сэйф Попов үй иелерінің басымдығын нығайтты – 2:0. Голдар: Стойсавлевич 5 (1:0), Попов 61 (2:0).

«Алтай» 22 ұпай жинап, төменгі аймақтан шығып, 13-ші орынға көтерілді. «Қайсар» 20 ұпаймен соңғы, 16-шы орында қалды. Дәл осынша ұпай «Ертістің» еншісінде, ол бір саты жоғары тұр.

Турнир кестесі

25-турдан кейін үздік үштік: «Ордабасы» – 55 ұпай, «Қайрат» – 54, «Астана» – 45. «Оқжетпес» 42 ұпаймен төртінші, «Ақтөбе» 38 ұпаймен бесінші орында.