Астана маңындағы Вячеслав су қоймасында қоқыс таулары пайда болғаны туралы блогердің жарияланымынан кейін Ақмола облысы Аршалы ауданының әкімдігі жағдайға түсініктеме берді. Бұл туралы Qazaqyia.kz порталы Kursiv Media басылымына сілтеме жасап хабарлайды.
Жыл басынан бері су қоймасы аумағында бес экологиялық субботник өткізілді. Оларға «Қазгидромет» РМК, Су ресурстары және ирригация министрлігі, «Қазводхоз» РМК, «Жас Нұр» ЖШС, еріктілер және жергілікті тұрғындар қатысты. Барлығы акцияларға 450-ге жуық адам қатысты.
«Сонымен қатар, мамандандырылған техниканы ұсынуға және жиналған қоқысты шығаруды ұйымдастыруға тұрақты негізде көмек көрсетіледі, бұл жағалау аумағын үнемі санитарлық тазалау жұмыстарын жүргізуге мүмкіндік береді», — деп түсіндірді ведомствода.
Әкімдік жазғы кезеңде су қоймасына күн сайын көптеген демалысшылар келетінін және қалдырылатын қоқыс көлемі уақтылы тазалау мүмкіндігінен айтарлықтай асатынын мойындады. Тіпті тартылған ұйымдардың тұрақты жұмысына қарамастан.
«Осыған байланысты барлық демалысшыларды тазалықты сақтауға, қоршаған ортаға ұқыпты қарауға және демалғаннан кейін қоқысты шығаруға шақырамыз. Мемлекеттік органдардың, ұйымдардың, еріктілердің және азаматтардың бірлескен күш-жігерімен ғана табиғи аумақты таза және барлығына ыңғайлы етіп сақтауға болады», — делінген әкімдік жауабында.
Бұған дейін блогер chingizcheetah және басқа әлеуметтік желі қолданушылары Вячеслав су қоймасындағы қоқыс тауларының бейне және фотосуреттерін жариялап, демалысшылардың осындай қарым-қатынасына байланысты астана маңындағы жалғыз танымал демалыс орны жабылуы мүмкін деген қауіп білдірді.