Астанада, Есіл ауданындағы Әл-Фараби даңғылында маршруттық автобус өртенді. Оқиға орнынан түсірілген видео әлеуметтік желілерде пайда болды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Төтенше жағдайлар министрлігінің мәліметінше, өрт қоғамдық көліктің мотор бөлігінде шыққан. Оқиға орнына дереу өрт сөндіру бөлімшелері мен Апаттар медицинасы орталығының мамандары жіберілді.
Құтқарушылар келген кезде автобустың мотор бөлігі ашық жалынмен қапталған. Барлық жолаушылар жедел қызметтер келгенге дейін салоннан өздігінен шығып үлгерген.
«ТЖМ қызметкерлерінің үйлесімді әрекеттерінің нәтижесінде өрт қысқа мерзімде жойылды. Өрт сөндірушілер жалынның бүкіл автобусқа таралуына жол бермеді», — делінген ТЖМ хабарламасында.
Ведомство оқиға салдарынан ешкімнің зардап шекпегенін атап өтті. Өрттің себебін мамандар анықтап жатыр.
Бұған дейін «Курсив» Семейде автобустың жүріп бара жатып өртеніп, толығымен жанып кеткені туралы жазған болатын. Ал Ақтөбедегі жанармай құю бекетінде автокөлікте екі бала мен ересек адам қаза тапты.