Ақтөбеде туристік компанияның ондаған клиенті демалысқа ұша алмай қалғанын айтып, жалпы залал 219 млн теңгеге жетуі мүмкін екенін хабарлады. Бұл туралы Qazaqyia.kz порталы Kursiv Media басылымына сілтеме жасап хабарлайды.
Зардап шеккендердің бірі Динара Катан чектер мен басқа да растайтын құжаттарды жинағанын айтты.
«Жалпы залал сомасы – 219 миллион. Бізде тізім, чектер – бәрі бар. Барлығы арыз жазды. Біздің талабымыз – бәрі заңды болуы және ақшамызды қайтару», – деді ол.
Тағы бір клиент Асылбек Дүйсенбеков 5-13 тамыз аралығында Анталияға отбасылық тур сатып алғанын айтты. Ұшу Алматыдан жүзеге асуы керек еді.
«Біз отбасымызбен Алматыға келдік, бізге билеттерді жібереміз деп уәде берді. Бірақ ұшудан бір күн бұрын турымыздың тоқтатылғанын хабарлады. Мен компанияға шамамен 2 млн теңге төледім», – деді ол.
Клиенттердің айтуынша, олар Түркия, Мысыр және Грузияда демалысты жоспарлаған. Кейбіреулер бұған дейін осы компанияның қызметін пайдаланып, шетелге сәтті сапар шеккен, сондықтан таныстарының ұсынысы бойынша қайта жүгінген.
Туристердің бір бөлігі жолдамаларды бөліп төлеу арқылы рәсімдеп, қазір сапар болмағанына қарамастан қарызды төлеуді жалғастыруда. Сонымен қатар, көпшілігі халықаралық рейстер жоспарланған Алматыға дейінгі жолды өз қаражатымен төлеген.
Зардап шеккендердің айтуынша, алдымен компания қызметкерлері кездесулерді кейінге шегеріп, сапарлар мәселесін шешеміз деп уәде берген, алайда кейін қоңыраулар мен хабарламаларға жауап беруді тоқтатқан.
Полицияға алғашқы арыз 6 тамызда түскен. Қазіргі уақытта ресми түрде 17 адам жүгінген.
Ақтөбе облысы полиция департаментінде алаяқтық бабы бойынша сотқа дейінгі тергеу жүргізіліп жатқанын хабарлады.
«Сондай-ақ, жеке басы анықталған күдіктінің орналасқан жерін анықтау бойынша жедел-іздестіру іс-шаралары жүргізілуде», – деді Ақтөбе облысы ПД баспасөз қызметінің жетекшісі Ерболат Сарқұлов.
Туристік компания иесінің орналасқан жерін қазіргі уақытта құқық қорғау органдары анықтауда.