Ақтөбе тұрғыны Қазақстан Сыртқы істер министрлігіне 24 жастағы ұлына көмек сұрап жүгінді. Ол Грекия түрмесінде екі жылға жуық отыр. Әйелдің айтуынша, Рашид Кадиров мигранттарды заңсыз тасымалдағаны үшін 125 жылға бас бостандығынан айыруға сотталған. Бұл туралы Qazaqyia.kz порталы Kursiv Media басылымына сілтеме жасап хабарлайды.
Нұрхан Кадырованың айтуынша, оның ұлы Instagram-дан Түркиядағы жұмыс туралы хабарландыру тауыпты. Оған ұшақ билетін төлеп, туристерді моторлы қайықтармен серуендетуге байланысты табыс уәде еткен.
Кейін, әйелдің айтуынша, жігіт Грекияға заңсыз мигранттарды тасымалдауға тартылып, сонда ұсталған. Анасының пікірінше, ұлы қылмыстың ұйымдастырушысы емес, оқиғаны бақылаған үйлестірушінің нұсқауларын орындаған.
Әйел сот процесі кезінде ұлына аудармашы болмағанын, сондықтан ол құжаттардың мазмұнын түсінбей қол қойғанын айтты. Оның айтуынша, сот тағайындаған айыппұл шамамен бір миллиард теңгені құрайды.
Қазір, анасының айтуынша, Рашид екінші сот отырысын күтіп отыр. Отбасы онымен байланысып, азық-түлік пен қажетті заттарға ақша жіберіп тұрады.
«Курсивтің» сауалына жауап берген Сыртқы істер министрлігі Қазақстан азаматымен болған жағдайды білетіндерін растады.
«Аталған азамат Грекия сотының үкімімен мигранттарды заңсыз тасымалдауға жауапкершілік көздейтін бап бойынша сотталды. Жергілікті заңнамаға сәйкес, бұл әрекет ауыр қылмыстар санатына жатады. Грекиядағы дипломаттарымыз өз құзыреті шегінде азаматқа қажетті консулдық-құқықтық көмек көрсетуде. Мәселе министрліктің бақылауында», — деп хабарлады СІМ.
Ведомство сот талқылауының қай сатыда екенін және үкімді қайта қарау мүмкіндігін нақтыламады.
Бұған дейін «Курсив» Нью-Йоркте бір ер адам Бруклин көпіріне шығып, Қазақстанның мемлекеттік туы қоса бірнеше ту іліп, содан кейін Ист-Ривер өзеніне секіргенін хабарлаған. Ол тірі қалып, полиция құтқарып, ауруханаға жеткізілді. Редакция Қазақстан СІМ-не сауал жолдаған.