Ақтөбеде 46 жастағы ер адам өзін Сыбайлас жемқорлыққа қарсы қызметтің (Антикор) қызметкерімін деп таныстырып, азаматтардан миллиондаған теңге алдап алғаны үшін сотталды. Бұл туралы Qazaqyia.kz порталы Kursiv Media басылымына сілтеме жасап хабарлайды.
«Диапазон» басылымының хабарлауынша, алаяқ жергілікті тұрғын әйелге өзінің антикоррупциялық қызметте жұмыс істейтінін, олардың базасында төмен бағамен сатып алуға болатын тәркіленген пәтерлер бар екенін айтқан. Сонымен қатар, ол оған «Даму» қорынан 15 млн теңгеге дейін тегін несие рәсімдеуге көмектесетінін уәде еткен.
Алданған әйел алдымен ер адамға пәтер үшін 2 млн теңге берген, кейін тегін несие алу үшін тағы бірнеше соманы тапсырған. Қажетті қаражатты табу үшін ол банктен 2,7 млн теңге несие рәсімдеген.
Кейін ол алаяқтың құрбаны болғанын түсінген. Бұл адамның антикоррупциялық қызметке де, «Даму» қорына да еш қатысы жоқ екені анықталған.
Тергеу барысында алаяқтың осыған ұқсас схемамен тағы үш адамды алдағаны белгілі болған. Олар да арзан баспана алу үмітімен миллиондаған теңге берген, бірақ уәде орындалмаған соң полицияға арызданған.
Сотта алаяқтық үшін айыпталған ер адам кінәсін толық мойындап, адамдарды қалай алдағанын есіне түсіре алмайтынын айтқан. Осыған қарамастан, ол барлық жәбірленушілерге келтірілген залалды толық өтеп, олармен медиативтік келісім жасасқан.
Сот оны 3,5 жылға бас бостандығынан шектеу жазасына кесіп, ойын-сауық мекемелеріне баруға тыйым салған.
Бұған дейін «Курсив» ақтөбелік алаяқтың әлеуметтік желілер арқылы жалған турлар сатқаны туралы жазған болатын.