«Ақтөбе – Қандыағаш» автожолы ақылы болады, деп хабарлады Көлік министрлігі. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
Ақылы автомобиль жолдарының желісін кеңейту аясында «Қандыағаш – Мақат» ақылы жолының құрамына «Ақтөбе – Қандыағаш» автожолының 11-шақырымынан 100-шақырымына дейінгі қайта жаңғыртылған бөлігі енгізіледі.
Жол жүру ақысы учаскелерге қарай әртүрлі болады.
«Атап айтқанда, 11-шақырымнан 87-шақырымға дейінгі аралықта барлық көлік түрі, соның ішінде жеңіл автомобильдер үшін де ақы алынады. Ал 87-шақырымнан 100-шақырымға дейінгі учаскеде және «Қандыағаш – Мақат» жолының қалған бөлігінде ақы тек автобустар мен жүк автомобильдерінен алынады», – деп жазылған хабарламада.
Жол жүру құны жүріп өткен қашықтыққа, көлік құралының санатына, жүк көтергіштігіне және төлем тәсіліне байланысты белгіленеді.
Іргелес аудандардың тұрғындарына жеңілдікпен абонементтер қарастырылған. Жергілікті тұрғындардың жеңіл автомобильдеріне арналған жылдық абонемент құны 1 АЕК болады.
Ал жергілікті автобустар мен жүк автомобильдері үшін көлік санатына қарай айлық абонемент құны 1-ден 5 АЕК-ке дейін, жылдық абонемент 12-ден 60 АЕК-ке дейін белгіленеді.