Ақтөбе облысында «елес турлар» бойынша қылмыстық іс тергелуде. Алданғандардың саны жүздеген туристі құрайды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Тергеу мәліметтері бойынша, туристік компаниялардың бірінің өкілдері 200-ден астам клиенттен демалыс ұйымдастыру үшін ақша алған. Адамдар туристік жолдамаларды, қонақүйлерді брондауды және әуебилеттерді төлеген, алайда уәде етілген қызметтерді алмаған.
Нәтижесінде көптеген облыс тұрғыны жоспарланған жазғы демалысқа шыға алмаған.
«Қазіргі уақытта полиция қызметкерлері сотқа дейінгі тергеп-тексеру жүргізіп, оқиғаның барлық мән-жайын, зардап шеккендердің санын және келтірілген материалдық залалдың мөлшерін анықтауда», — деп хабарлады Ақтөбе облысы полиция департаменті.
Ведомство демалыс маусымында алаяқтардың өздерін туристік компаниялардың өкілдері ретінде таныстыратынын еске салды. Әдетте олар клиенттерді күдікті төмен бағалармен тартады, шұғыл төлемді талап етеді, ал ақшаны алғаннан кейін байланысқа шықпайды.
Бұған дейін Ақтөбе облысы прокуратурасы алаяқтардың әлеуметтік желілерде өз құрбандарын іздеп, клиенттерге билет сатып алудан бастап тұруды брондауға дейінгі қызметтердің толық пакетін ұсынғанын хабарлаған.
Ақтөбе облысы полиция департаментінің Instagram-дағы ресми парақшасында бұл жағдайға қатысты жарияланым жасалды.
Құқық қорғау органдары азаматтарды саяхатты жоспарлау кезінде сақ болуға және тек сенімді туроператорларға жүгінуге шақырады. Алаяқтықтың алдын алу үшін компанияның лицензиясын тексеру, шартты мұқият оқу және күмәнді төмен бағалардан аулақ болу ұсынылады.