Ақтау тұрғындары ыстық сусыз кемінде тамыз айының соңына дейін қалады. Суды қайта беру мерзімі магистральдық құбырдағы жөндеу жұмыстарының жалғасуына байланысты ауыстырылды. Бұл туралы Qazaqyia.kz порталы Lada.kz басылымына сілтеме жасап хабарлайды.
Мерзімнің ауыстырылғаны туралы «МАЭК» ЖШС хабарлады. Компаниядағылар магистральдық құбырдағы жұмыстар әлі жалғасып жатқанын, сондықтан бұрын жарияланған мерзімде ыстық суды қайтару мүмкін емес екенін түсіндірді.
«Құрметті Ақтау тұрғындары. Магистральдық құбырдағы жөндеу жұмыстарының жалғасуына байланысты ыстық судың берілуі тамыз айының соңына ауыстырылады», – деп хабарлады энергокомбинаттың баспасөз қызметі.
Бастапқыда қалада ыстық суды 27 маусым сағат 10:00-ден 12 шілде сағат 24:00-ге дейін өшіру жоспарланған болатын. Алайда кейін жөндеу жұмыстарының аяқталу мерзімі 1 тамызға дейін ұзартылды.
Енді «МАЭК» тағы бір ауыстыру туралы хабарлады. Жаңартылған кестеге сәйкес, Ақтауда ыстық су тамыз айының соңынан ерте пайда болмайды.
Бұған дейін «Курсив» Қазақстанның Орталық Азиядағы ең үнемді су тұтынушы атанғанын жазған болатын.