АҚШ-тағы ең үлкен су қоймасы – Мид көлінде адамның жақ сүйегі табылды. Бұл туралы Qazaqyia.kz порталы BBC News басылымына сілтеме жасап хабарлайды.
Ұлттық парк қызметінің мәліметінше, 16 тамызда Невада штатындағы Боулдер-Бич жағажайында адамның қаңқа қалдықтары табылған. Оқиға орнына парк рейнджерлері мен Лас-Вегас полиция департаментінің қызметкерлері барды.
Қызмет өкілдері бұл оқиға тергеліп жатқанын, қазіргі уақытта қосымша ақпарат жоқ екенін мәлімдеді.
Куәгерлердің бірі Дианелис Молина Круздың айтуынша, оның досы Ноэль Де Леон көл жағасында тастармен ойнап жүріп, жақ сүйегін тауып алған. "Ол жақ сүйегін көргенде, тістері мен бәрі көрініп тұрды", - дейді ол.
Де Леонның пікірінше, Мид көліндегі су деңгейінің төмендеуі адам қалдықтарының табылуына әкелді. "Су деңгейі қалыптыдан әлдеқайда төмен. Су төмендеген сайын, қаңқалар жоғары шығады", - деді ол.
Мид көлі - АҚШ-тағы ең үлкен су қоймасы. Оның деңгейі 2000 жылдан бері төмендеп келеді. АҚШ мелиорация бюросының мәліметінше, өткен аптада су деңгейі теңіз деңгейінен 1040 футқа (316 метр) дейін төмендеген. Бұл 2022 жылдың шілдесінде белгіленген алдыңғы рекордтан айтарлықтай төмен.
Су қоймасы Кларк округінде орналасқан. АҚШ құрғақшылық мониторының мәліметінше, округтің көп бөлігі орташа құрғақшылық аймағында.
Соңғы жылдары құрғақшылық күшейіп келеді. Ғалымдар мұны климаттың өзгеруімен байланыстырады.
Тұрақты ыстық ауа райы бірнеше елдегі өзендер мен көлдердегі су деңгейінің төмендеуіне әкеліп, күтпеген жаңалықтарға жол ашты.
Венгрияда осы айдың басында Будапешттегі Дунай өзенінен Екінші дүниежүзілік соғыс кезінде қаза тапқан екі неміс солдатының сүйегі табылды. Сондай-ақ, неміс әскерінің мотоциклі де табылды.
Сербиядағы Прахово маңындағы Дунайдан Екінші дүниежүзілік соғыс кезіндегі кеменің қалдықтары көрінді.
Ұлыбританиядағы Ратленд су қоймасында су деңгейінің төмендеуінен Нетер Хэмблтон ауылының қалдықтары ашылды. Бұл ауыл су қоймасын жасау үшін бұзылып, су астында қалған еді.