АҚШ-та орбитаға орналастырылған ғарыштық бақылау қаруы бар. Бұл туралы АҚШ Әскери-әуе күштерінің министрі Трой Мейнк мәлімдеді, деп хабарлайды Defense One. Бұл туралы Qazaqyia.kz порталы Kursiv Media басылымына сілтеме жасап хабарлайды.
Мәлімдеме 14 қыркүйекте Мэриленд штатында өткен Air, Space & Cyber конференциясында жасалды. DefenseScoop басылымы атап өткендей, бұл Пентагон өкілінің АҚШ-тың тікелей ғарышта орналасқан қаруы бар екенін алғаш рет жария түрде растауы.
«Бүгін біз өзгеретін қауіп-қатерлерге, олар қайда пайда болса да, дайындықты қамтамасыз етуді жалғастырудамыз. Сондықтан АҚШ-та қазір бірлескен күштерді қарсыластың дұшпандық әрекеттерінен қорғай алатын, орбитаға орналастырылған ғарыштық бақылау қаруы бар», — деді Мейнк.
Министр қандай жүйелер туралы айтылып жатқанын, олардың ғарышта қаншасы бар екенін және қандай мүмкіндіктерге ие екенін нақтыламады. Air & Space Forces Magazine басылымының деректері бойынша, Мейнк сөз сөйлегеннен кейін бұл тұжырымның әдейі жасалғанын және «өте жақсы ойластырылғанын» атап өтті.
Мәлімдеме сарапшыларды алаңдатты. Secure World Foundation ұйымының ғарыштық қауіпсіздік және тұрақтылық жөніндегі директоры Виктория Сэмсон Вашингтонның мойындауы Қытай мен Ресейді өздерінің ғарыштық қарулары туралы ашық айтуға итермелеуі мүмкін деп болжады.
Оның пікірінше, сөз спутниктерді физикалық түрде жоюға және ғарыш қоқысын жасауға қабілетті кинетикалық жүйелер туралы емес. Сарапшы АҚШ орбитаға радиоэлектрондық күрес және сигналдарды басу құралдарын орналастырған болуы мүмкін деп болжады.
Мейнк сондай-ақ қыркүйекте қозғалыстағы әуе нысандарын анықтауға арналған спутниктік жүйенің прототиптерін орбитаға шығару жоспарланып отырғанын хабарлады. Сонымен қатар, американдық Golden Dome зымыранға қарсы қорғаныс жүйесі үшін әзірленіп жатқан ғарыштық тұтқыштар ұшуға дайындық сатысына жетті.