АҚШ Конгресіндегі демократтар Украинаға арналған жаңа қауіпсіздік көмегі пакетін әзірлеуді жоспарлап отыр, деп жазды Financial Times. Бұл туралы Qazaqyia.kz порталы Sputnik Kazakhstan басылымына сілтеме жасап хабарлайды.
«Капитолийдегі демократтар Украинаға арналған қауіпсіздік саласындағы жаңа көмек пакетін қалыптастыруға күш салып жатыр. Өкілдер палатасының сыртқы істер комитетіндегі демократтардың бірінің көмекшісі оның көлемі шамамен 15 миллиард долларды құрауы мүмкін екенін айтты», — деп жазылған мақалада.
Басылымның мәліметінше, Украинаны қолдайтындар Конгресс жаңа құраммен жұмысқа кірісетін қаңтар айына дейін Украинаға қандай да бір көмек түрі қарастырылады деп үміттеніп отыр.
2022 жылдың наурызынан 2024 жылдың желтоқсанына дейін Вашингтон Киевке шамамен 43,4 миллиард доллар көлемінде әскери көмек көрсеткен. Ақ үйдегі билік ауысқаннан кейін АҚШ Қорғаныс министрлігінің арсеналдарынан қару-жарақ жеткізу тоқтатылды. Мұндай соңғы көмек пакеті туралы 2025 жылдың 9 қаңтарында жарияланған. Содан бері Украинаға қару-жарақ жеткізу тек АҚШ-тың Украинаға қауіпсіздік саласындағы көмек бастамасы (USAI) аясында бұрын жасалған ұзақ мерзімді келісімшарттар бойынша жүзеге асырылып келген.