АҚШ үкіметі Илон Масктың X әлеуметтік желісіне көк белгілері үшін Еуроодақ салған 120 млн еуро (105 млн фунт) айыппұлды жою туралы сот талабына қосылуға ұмтылып отыр. Бұл туралы Qazaqyia.kz порталы BBC News басылымына сілтеме жасап хабарлайды.
2025 жылдың желтоқсанында Еуропалық комиссия платформаны пайдаланушыларды «алдайды» деп айыптады, себебі ол ақылы түрде көк тексерілген белгісін алуға мүмкіндік бергенімен, аккаунттың артында кім тұрғанын «мәнді түрде текстермейді».
Алайда АҚШ Бас прокурорының көмекшісі Бретт А. Шумат бейсенбі күні комиссияның өз бақылауынан тыс американдық компанияларға ықпалын кеңейтуге «орынсыз әрекет жасағанын» мәлімдеді.
Дональд Трампты және басқа республикашылдарды сайлауға миллиондаған доллар жұмсаған Маск бұған дейін ЕО-ның технологиялық реттеуі компаниялардың «дамуын тежейді» деп мәлімдеген.
АҚШ Әділет министрлігі (DOJ) Маск пен X-тің істі жою әрекеттерін қолдау үшін ЕО-ның Жалпы сотына өтініш берді. Онда ЕО Сотының Жарғысындағы заң бөліміне сәйкес, мемлекет сотқа «істің нәтижесіне мүдделі екенін дәлелдей алса», дауға араласа алатынын алға тартады.
Әділет министрлігі АҚШ-тың комиссияның кез келген шешімінің «халықаралық құқықта аумақтық юрисдикция қалай түсінілетініне» сәйкес қолданылуын қамтамасыз етуге «айқын мүдделі» екенін мәлімдеді.
Сондай-ақ ол өз экономикасына «айтарлықтай үлес қосатын» АҚШ-та орналасқан цифрлық қызметтерге «өзгеше зиян келтірмеуін» қамтамасыз етпек.
Жұма күнгі баспасөз мәслихатында Еуропалық комиссияның өкілі Томас Ренье сотта өз ұстанымын «қорғауға дайын» екенін айтты.
Ол комиссияның Цифрлық қызметтер туралы заңды бұзуына байланысты «берік ісі» бар екенін қосты.
Көк белгілерді пайдаланудан бөлек, ЕО реттеушілері X-ті жарнамаларының ашықтығын қамтамасыз етпегені және зерттеушілерге қоғамдық деректерге қол жеткізуді бермегені үшін айыптаған.
Реттеушінің технологиялық егемендік жөніндегі атқарушы вице-президенті Хенна Вирккунен айыппұл салынған кезде оның «X-ті пайдаланушылардың құқықтарын бұзғаны және жауапкершіліктен жалтарғаны үшін жауапқа тартып жатқанын» айтқан.
«Пайдаланушыларды көк белгілермен алдау, жарнамалар туралы ақпаратты жасыру және зерттеушілерді шеттету ЕО-да онлайн кеңістікте орын алмауы тиіс», — деді ол.
АҚШ Мемлекеттік хатшысы Марко Рубио мен Федералдық коммуникациялар комиссиясы (FCC) ЕО реттеушісін сынап, оны американдық фирмаларға шабуыл жасап, цензура қолданады деп айыптаған.
«Еуропалық комиссияның айыппұлы тек X-ке шабуыл емес, бұл шетелдік үкіметтердің барлық американдық технологиялық платформаларға және американ халқына жасаған шабуылы», — деп жазды Рубио X-тегі жазбасында.
«Американдықтарды онлайн цензуралау күндері аяқталды».
Оның сөздерін Маск қайта жариялап, «абсолютті дұрыс» деп қосты.
Еуропалық комиссия нақты бір ұлтты нысанаға алғанын жоққа шығарып, өзінің жаһандық эталон ретіндегі рөлін сақтау үшін цифрлық және демократиялық стандарттарын қорғап жатқанын мәлімдеді.
Бұл әрекет Комиссияның Цифрлық қызметтер туралы заң (DSA) бойынша алғашқы ресми сәйкессіздік шешімі болды. DSA — ЕО-да онлайн платформаларды реттейтін екі міндетті ережелер жинағының бірі.
Алайда ЕО платформаға қатысты бірнеше басқа тергеу жүргізіп жатыр, оның ішінде нақты адамдардың сексуалдандырылған бейнелерін жасау үшін пайдаланылды деген алаңдаушылыққа байланысты интеграцияланған AI көмекшісі Grok-қа қатысты тергеу бар.