Ақмола облысы Жақсы ауданының тұрғыны үй жануарына қатыгездік көрсеткені үшін 100 сағат қоғамдық жұмысқа сотталды. Ер адам итті өзінің жұбайының аяғынан тістеп алғаннан кейін өлтірген. Бұл туралы Qazaqyia.kz порталы Kursiv Media басылымына сілтеме жасап хабарлайды.
Жақсы аудандық сотының мәліметінше, ит танысының үйінің ауласында әйелдің аяғын тістеп алған. Мұны білген ер адам ашуланып, балта алып, оның үйіне барған.
«Итті шақырып алып, оның басына екі рет соққы жасады», — деді сотта.
Ветеринар дәрігердің қорытындысы бойынша, жануар алған жарақаттарынан қаза тапқан.
Сотта ер адам кінәсін мойындап, өкінген. Оның кінәсін иттің иесі мен куәгерлердің айғақтары, сараптама қорытындысы, бейнежазба және істің басқа да материалдары растады.
Іс Қылмыстық кодекстің 316-бабының 2-бөлігі — жануардың өліміне әкеп соққан қатыгездік бойынша қаралды. Жаза тағайындау кезінде сот кінәні мойындауды, өкінуді және сотталушының мүліктік жағдайын ескерді: ол жұмыс істемейді.
Ер адамға 100 сағат қоғамдық жұмыс тағайындалды. Жәбірленуші тарап азаматтық талап қоймаған. Үкім заңды күшіне енді.