Алматының Ауэзов ауданындағы Жетісу шағын ауданында орналасқан пәтерлердің бірінен 33 жастағы жергілікті тұрғынның денесі табылды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Қалалық полиция департаментінің мәліметінше, алдын ала деректер бойынша ер адам өзін-өзі өлтірген. Оқиға орнына тергеу-жедел тобы келді.
«Қажетті тергеу әрекеттері жүргізілуде. Алдын ала анықталғандай, соңғы бірнеше айда ер адам қиын өмірлік кезеңді бастан өткерген. Қазіргі уақытта мамандар оның өмір салтын, араласатын ортасын және болған оқиғаға қатысы болуы мүмкін басқа да мән-жайларды зерделеп жатыр», — делінген хабарламада.
Түпкілікті қорытынды тергеу нәтижелері бойынша жасалады.
Бұған дейін «Курсив» Астанадағы қайғылы оқиға туралы жазған болатын, онда әйел мен бала қаза тапқан. Алдын ала деректер бойынша, 27 жастағы астаналық 15-қабаттан секіріп, ішінде екі жасар бала болған балалар арбасына құлаған.