Алматыда Әуезов ауданында орналасқан Батыс жылу кешенінің трансформаторлық қосалқы станциясының аумағында ірі өрт болды. Бұл туралы Qazaqyia.kz порталы Kursiv Media басылымына сілтеме жасап хабарлайды.
Куәгерлер түсірген кадрларда қала үстіне көтерілген қою түтін байқалады. Алдын ала мәлімет бойынша, өрт энергетикалық инфрақұрылым нысанының аумағында болған. Өрттің себептері мен ықтимал салдары туралы әзірге хабарланбады.
ТЖМ өкілдері оқиға орнында өрт сөндірушілер жұмыс істеп жатқанын хабарлады. «Осы минуттарда ТЖМ қызметкерлері Алматының Әуезов ауданы Отарская көшесіндегі трансформаторлық қосалқы станциядағы өртті сөндіруде», – делінген ТЖМ хабарламасында.
Зардап шеккендер мен шығын көлемі туралы ақпарат нақтылануда. Өрттің ауқымы мен оның қаланың электрмен жабдықталуына әсері әзірге белгісіз. Қосалқы станция Батыс жылу кешенінің құрамына кіреді, ол Алматының батыс бөлігін жылумен және электрмен қамтамасыз етеді. Өрттің себептерін анықтау үшін арнайы комиссия құрылуы мүмкін.
Қала тұрғындарына қауіпсіздік шараларын сақтау және өрт сөндіру қызметтерінің жұмысына кедергі келтірмеу ұсынылады. Оқиғаның мән-жайы толық анықталғанға дейін қосымша ақпарат берілетін болады.